Mexico menoknok lendong nung asür 60 jungogo

JUCHITAN, SEP 9: Brehostibarnü Mexico nung menoknok tesashi anokba sülen Mexico Tir, Enrique Pena Nieto (tiyong)-i Juchitan tesem semdanga nüburtem den jembiba mapang tangokba noksa nung angur.

Mexico City, September 09 (Agencies): Mexico nung Pacific tzüyimküm aser southern state aika nung menoknok magnitude 8.2 anokba lendong ajanga taküm samar nisung 60 junggogo, ta ketdangsertemi ashi.
Oaxaca state nung nisung 45, Chiapas nung 10 aser Tabasco state nung asem asüba osang National Emergency Committee ajanga Hokulbarnü metetdaktsüogo, ta national civil protection coordinator Luis Felipe Puente-i Twitter nung zülutsü.
Tehuantepec region nung Juchitan de Zaragoza yimti nung nisung 30 tak tali taküm samaogo, ta Oaxaca Angh, Alejandro Murat-i osangbener dang ashi.
Juchitan nung city hall ka jirepa police ka nembang südi, ta temolung melemi bushir aser iba yimti nung ki 7,000 raksa, ta Murat-i ashi.
Tang mapang ketdangsertemi ki teraksa agi anenbanga aliba nungi nisung agitettsü asoshi bushiba mapang ka lir aser nüburtem nem atsükokdak ki anepalutsüba mapang lir, ta pai shisem.
Mexico tir Enrique Pena Nieto-a Hokulbarnü Puente aser Government Secretary, Miguel Angel Osorio Chong na den külemi menoknok agi kongshia aliba tesem semdangtsü asoshi Oaxaca-i aru.
Chiapas angh, Manuel Velasco-i ashiba agi, par state nung iba lendong ajanga taküm samatsür 9 liasüba 11 kümogo aser item rongnung ka bo temolungjang agi mapa junga meinyaki asü.
Chiapas nung iba menoknok ajanga nisung aliba ki 1,700, kaket reju 700 aser public building 18 raksatsü. Iba menonok sülen tsunami arutsü tsübuba ajanga Mexico nung ketdangsertemi tzüküm nung aliba nisung 10,000 tanga tesemi anir ao, saka iba tesem nung tsunami arutsü mapang süyiogo, ta Hawaii nung aliba Pacific Tsunami Warning Center ajanga ashi.
Brehostibar aonung 11:49 ako meta iba menoknok tiyong ya Tres Picos, Chipas nungi kilometre 119 orr anok.
Iba menoknok ya 1985 küm anoka Mexico City nisung meyerijang aika taküm samatsüba dang tera tesashiba lir aser Mexico nung küm 100 nung tang anokiba ya tesashiba lir, ta Penta Nieto-i Hokulbarnü National Disaster Prevention Center nungi osangbener den jembidang ashi.
Iba menoknok tesashi anokba ya south aser central Mexico nung aliba state 10 nung kongshi aser item state tem nung linük indang nütsüng tesadang lir, ta tir-i ashi.
Iba menoknok ya kidanger linük, Guatemala nunga kongshi aser iba linük nung chichiba menoknok anoker ghonda ka tsüngta trokben anokshitsü.
Federal sorkari “extraordinary emergency” ya Chiapas nung municipalities 118 aser Oaxaca municipalities 41 nung sangdonga lir.