Mexico nung Hurricane agi ki jenti raksatsüogo

Chamela (Mexico) October 25 (Agencies): Mexico Pacific tzükümlen Patricia ta ajaba yipru (Hurricane Patricia) agi ki jenti raksatsü saka taoba mapang ama mesüi anülulentip tsütsüi karakara süshia ao, ta ketdangsertemi ashi.
Chamela nung Patricia yipru yagi angopurtem ki 40 tashi pongtoktsüogo.
Hokolbar nü yipru aruya-a anguba sülen aser ano iba yipru ali matong tsüngda iba tesem nung aliba nüburtemi ki azüngteta yutsür ajenba ajanga shinga meyiru.
Honibar nü parnok pei talidak bushia aruba sülen sorkari teyari kecha magütsür, ta nemnema liasü.
“Onok kecha maka. Onoki bendenba ajak samaogo,” ta lar ki asüba dangbo kilem aser jara mali tesem nung nokdaker Griselda Hernandez-i ashi.
Chamela nung alirtem timba ka pei rongsen ajak samaogo saka iba yipru ajanga taküm ka danga mesamatsüba atema ketdangsertem kanga pelatepa temulung süngzüka liasü.
“Lendong arutsü osang sangdongba ajanga takoksa-a bener arur, ajisüaka osang sangoktsüba agi taküm kümzüker,” ta Puerto Vallarta nung restaurant kibur Ruben Fregoso-i ashi.
Patricia maru tsüngda Puerto Vallarta nung aliba hotel tem azüngtetdaktsü aser tourist meyirjang aika bus aser tayimtsü ajanga aniena liasü. Aji oda süaka, tsübua bilemba ama yipru ajanga takoksa kanga tulu bentsür maru.
Tzü-mopung takzürtemi Patricia ji gondha nung kilometre 325 shi kara arudar ta sangdong, ajisüaka tia ka, iba yipru tenem den tsüktepba ajanga gondha nung kilometre 270 agi ang Chamela tesem atong.
Iba yipru yagi Jalisco aser Colima state tem nung tzü metsüng tera adokdakja anentsüh tera aludaktsüba den süngdong lidong aika shisatsü.
Sepaitemi lenmang tem merüktetdar aser tayimtsü den gari lenmangtem ajak lapokogo.
Mexico nunger iba ama yipru arudang renemshir ataba asoshi, Transport Minister Gerardo Ruiz Esparza-i kanga tenüngsanga ashi.