Mexico nung lanurtem tanur abenba wara ka ajangshidar

Mexico City, March 10 (Agencies): Mexico nung arishi küm ter ser ta asüba (teenagers) lanurtem wara ka arur amai tanur kanga bulua bentepdar. Mexico nung küm shia lanur mashisa akümer parnok 400,000 shi lir aser ibaji ajanga linük nung mashisa alir noklang nung shilem 20 bo ajunger, ta mongintemi ashi.
Lanurtem mashisa akümba ya yimtak alir sensaker aser jila nung alir takar ajak dak ataloker. Sensaktiba aser takartiba state ajak nung lanurtem kanga bulua mashiteper, ta El Universal daily ajanga metetdaktsüba Xinhua news agency ajanga lepshia metetdaktsü.
“Mexico nung lanurtem mashisa akümba ya wara ka mesüka lir ta ashibaji onoki bendenloker jembir masü,” ta Mexico nung aliba National Autonomous University nung Institute of Social Research mongin, Carlos Weltian-i ashi.
Mexico nungeri par yimsü nung aliba ama mashisa alirtemji meshitettsür aser sobaliba rongnung züngoker, ta Weltian-i ashi.
El Universal-i mashisa alir aiür, arishi küm 13 tain, Joanna ajuruba otsü metetdaktsü. Iba aiür jagi, “Ni mashisa kümogo ta meteta arudang kanga pela liasü kechiba süra tetsür ajaki tetsü ka mekümteter,” ta ashi.
Joanna-i, “Ni ano maneni school azüngtsü aser iba mapang kütsüi ni asoba tanurji anepalutsü,” ta ashi.