Mexico nung totzü pipeline apok

Mexico City, Aenjeti/January 19 (Agencies): Honibarnü central Mexico nung totzü abenba pipeline ka apokba sülen nisung 20 pokset aser 54 yiruogo, ta ketdangser sangdong ka ajanga metetdaktsü.
Hidalgo state governor Omar Fayad-i ashiba agi, totzü abenba pipeline tapok kümer totzü yangzüka alua aliba localtemi tatenba mapang iba lendong atalok, kong parnok 20 tashi rongseta liasü.
“Nisung 20 rongsetba aser nisung 54 temang ronger mozükitem nung temang anepalua aliba kü nem osang agütsüogo, ta Fayad-i local FaroTV dang ashi.
Local media ajanga nüburtem pongdang balala nung totzü auya bener aoba sayuogo.
“Onoki metetba ajakagi iba tesem ya ozüng alema totzü auyaba tesem ka liasü aser iba tesem arongba mapang ketdangsertemi iba indang meteta liasü,” ta Fayed-isa ashi.
Anü aluba sülen ghonda ishika lir iba lendong atalokba indang mezüngbuba noksa television nung sayua liasü, kong nüburtem iba tesem nung jenshiba nguogo.
Federal aser state firefighter aser state totzü company tetsüti Pemex pur indang ambulance tem iba tesemi lendong ajurur alirtem yaritsü aoshi ao, ta governor-isa ashi.
Tri Andres Manuel Lopez Obrador-i national fuel theft prevention plan benoktsüba atema inyakba mapang ka nung tang iba lendong ya atalokogo
Pemex pipelines ajanga totsü auyazüka agiba ajanga 2017 küm Mexico USD billion 3 takoksa ajuru.
Ajisüaka sorkari iba mapa anendaktsütsü asoshi sentong benokba ajanga Mexico City densema linük nung gasoline aser diesel agi kanga anünga aküm aser nüburtem pei gari nung totzü inoktsü atema ghonda aika aser khen khenbo anogo songtema ataa liasü.
Lopez Obrador, shibai December 1 nü office mapa belenzük, pai iba ken o bentettsü asoshi nangzükogo aser Mexico nunger tem dang aremzüka atatsü mepeshia liasü.
Kasa mapang nung ketdangsertemi totzü auyaba dak sendakba nung ken o bushitsüngdangtsü atema individual investigation 1,700 lapokogo. Iba inyakyim ya taoba sorkar kübok Mexico nung black-market industry tulu ka aküm aser iba nung temesepba mozü shibelener tashi taittem densema liasü aser Pemex nung inyakertem ochimeshi kümdaktsü.
Lopez Obrador’er sorkari pipeline tongtibangtem army tem yoka tekümzükba magütsü tashi shibanga atatsü telemtetba agiogo.