Mexico nungeri Trump anema longkak ait

Mexico City, February 18 (Agencies) : Mexico aser US arrtsülen Mexico nunger nisung noklang aika adenshia, karibo kulab naro temesüng amer, nisung agi jara yanglua yur US Tir Donald Trump indang inyakyim anema longkak aita liasü, ta osangbenertemi ashi.
Iba longkak ya Hokolbarnü arrtsülen aliba Ciudad Juarez yimti nung ait.
Longkak ayongertemi, iba sentong ajanga Mexico nunger lungjemba sayur aser US nunger dang medemer tenüng nung aria bilemba sayur, ta ashiba Mexico nung aliba osangbenertemi metetdaktsü.
Iba longkak ya Chihuahua nung Angh Javier Corral-i ayongba lir.
“Donald Trump-i atsü koma tulu ka atsüdanga yuaka onoki mapudaktsü kechiba süra onoki apudakba ajanga tensa tamajungba akümtsü,” ta governor Javier-i longkak ait metenzük tsüngda ashi.
Pai, iba ama tensa ka nung Mexico nungeri US tembartem den tesendaktep tali akangshitsü, ta metetdaktsü.
Iba sentong nung adener US nung yimsüsür kaji El Paso, Texas nung mayor Oscar Leeser kija liasü.
Leeser-i, telongjem akatsü nüngdak ta ashi aser Juarez O El Paso naji yimti ka aser lokti ka lir, ta ashi.