Mexico osangbener Javier Valdez tepsetogo

Culiacan, May 16 (Agencies): Mexico nung miim mozü shibelenba osang sangdongba ajanga sempet agizüka alisang osangbener, Javier Valdez khasetogo.
Valdez telidak aser pa mapa inyakba tesem, Sinaloa state kübok Culiacan yimti nung Hombarnü mejangjaba nisung-i pa dak injang khaloktsü.
Arishi küm 50 tain, Valdez mapa inyakba nung ajemdaker pa nem Committee to Protect Journalists (CPJ) ajanga 2011 küm International Press Freedom Award agüja lir.
Aser taküm Mexico nung osangbener tepsetba rongnung pa densemogo.
Pai tentetba Mexico nunger osangkaket, Riodoce adokdak tesem nung lenmang anasa Valdez ya khaset.
Valdez-i osangbener mapa küm semer jungnüa inyakba mapang Mexico nung miim mozü shibelenba, nisung tepsetba aser miim mozü ayoker tashi tait telok, Sinaloa nunger indang pai kanga sashia züluja liasü.
Mexico ajanga US-i ozüng alema miim mozü bener aitba ya shilem 25 bo Sinaloa ajanga lir, ta nüburtemi amanger.
Iba telok nung tekolakba, Joaquin “El Chapo” Guzman ya tepuokdak nungi anaben tashi jena aoba 2016 küm apu aser January nung US-i anir ao.
Valdez tepsetba ya Mexico tir, Enrique Pena Nieto-ia aitsüogo aser par sorkari osangkakettem nüchiso asoshi bendanga agüja yaritsü, ta ashi.
Asüba ya bushisüngdang süogo aser Valdez’er kibong aser pa den külemi mapa inyakertem kümzüka ayutsü asoshi mapa inyaktsü, ta Sinaloa state attorney general, Juan Jose Rios-i ashi.
CJP nung Mexico nungi züngsem, Jan-Albert Hootsen-i , “Valdez tepsetba ya osangbener dak amakba lir, Mexico nung aliba osangbener ajunga,” ta ashi.
Valdez tepsetba aser osangbener taküm lendong nung aliba anema Mexico nung osang agütsür telok, Animal Politico aser Tercera Via-i Bodhbarnü longkak aittsü.
“Javier Valdez tepsetba ken o nung inyaksangshiba otsütem dang sangdongtsü,” ta Tercera Via-i parnok indang website nung metetdaktsü.
Mexico nung ‘freedom of expression’ temeden nung osangbenertem tepsetba ken o bushisüngdang asütsü asoshi sorkar meyong obendanger tasen ka taoba hopta shima lir.
Valdez aser par osangkaket zülurtem ya tamalen nungi amokmerena aru.
Riodoce indang office nung 2009 küm teka agi yangluba grenade ka mereploktsü, saka iba bomb ajanga oset dang raksatsü, ta Valdez-i ‘freedom of expression’ tentet, Index on Censorship dang taoba ita shia liasü.
“Nisung tepsetba aser miim mozü nung kiburtem indang ken o bushisüngdang masütsü atema phone ajanga aiben küdang shiogo. Ozü kibong samatsütsü tsüboba ajanga tongtibang osangtem bo magütsütsüsa aküm,” ta Valdez-i shia liasü.
Osangbenertem ya ‘blacklist’ nung alir ka ama lir aser na koba anogo nung tepsettsüar, mapa tamajung inyakertemi lemtettsü, ta taoba küm Valdez-i züluba keket ka sayaba mapang pai shia liasü.
March nung osangbener, Miroslava Breach khasetba sülen Valdez-i “Ola madoki malitsü” aser “Asenoka tepsetdaktsütsü” ta shia liasü.
Valdez ama Breach-ia nisung tepsetba, miim mozü shibelenba aser ochi mashi mapa inyakba osangtem sangdonga liasü.
CPJ ajanga ashiba agi taküm Mexico nunger osangbenertem tepseter tem rongnung ‘freelancer’ Maximino Rodriguez aser Cecilio Pineda Birto nunger densema lir.
1992 küm nungi tang tashi nung osangbener 40 tashi Mexico nung tepsetogo, ta CPJ ajanga ashir.