Mexico & Turkey na shishilemba sadema inyaktsü

Mexico City, February 04 (Agencies) : Hokolbarnü Mexico aser Turkey na tsüngda shishilemba mapa kecha tenokdangba melii sadema inyaktsü mulungtepogo, ta Mexico Finance Ministry sangdong ka ajanga metetdaktsü.
Tir Donald Trump-i yimsü asü tenzükba sülen nungi Mexico atema export tesem tulutiba, US-i mezüng ama shishilemba masüba ajanga Mexico export tali tajungba akümtsü mechi nung parnoki iba tenangzüktep agi.
Linük ana tsüngda tesendaktep asadangtsü asoshi Mexica Foreign Minister Luis Videgaray-i Turkey Foreign Minister Mevlut Cavusoglu den ajurutep aser tang dang nungi tesendaktep aser amalitep tajungba aser tashi taitba akümtsü atema ‘High-Level Binational Commission’ ka tenzükogo.
Linük anaprongi tejangraba balaka sayua Mexico aser Turkey na tsüngda sadem sadema shishilembatsü asoshi mulungtep, ta senden temer külen Videgaray-i ashi.
“Akhidang dang nungi, Mexico-i tanü alima den kanga salabanglar aser tetsüngda talang agi pilar liaka par linüki ozü linük den tembar linüktem dena shishilemba tsütsü tali tashi itshiner,” ta Videgaray-isa ashi.
2015 küm Mexico aser Turkey na tsüngda sen dollar million 884.4 alang shishilembatepa liasü.
Ketdangser anati G20 aser yimsüsüba o shishilemba sabang asoshi tentetba telok, Mexico, Indonesia, South Korea, Turkey aser Australia (MIKTA) inyakyim kübok sadema shishilembateptsü, tzü mopung melenba den raratsü aser International rongsenkettsüng tajungba kümdaktsütsü asoshi amalitepa inyaktsü mulungtepogo.
Cavusoglu-i Mexico semdangba mapang Mexico nung Turkish International Cooperation & Development Agency indang branch office-a lapokogo. Latin America nungbo ibala mesükba office ji ibai mezüng asütsü.