Mexico & Venezuela na Copa America quarter-i iogo

Pasadena, June 10 (Agencies): Mexico teloki goal 2-0 agi Jamaica telok madak takok ngua, tang tasyadak 2016 Copa America football asayamong quarterfinal asayatsü jenjang yashi, Brehostibar nü nguogo.
Venezuela telokia goal 1-0 agi otsüsütsüsa Copa America asayamong takok marok 15 ben tashi agizükba telok, Uruguay madak Philadelphia nung takok ngua semifinal-i aiba osang jangjaogo.
Külem Group C nung densemer, Mexico aser Venuela telok napronglai takok anguba yong Uruguay teloki tan asayamong nung joko toktepa shilem magitettsüsa jenjang tamajung ajuruogo.
Tan Group asaya nung tsükba ya Uruguay teloki 1997 sülenbo tan mezüngsüa Group asaya nung tsüker lir.
Venezuela midfielder, Alejandro Guerra-i metsüoktsüba ball goalpost nung tepdaker tanaben meyipa aruba ball agizüka külem asayar, Salomon Rondon-i asaya tenzüker minute 36 buba nung par Venezuela telok asoshi takokba goal agüja liasü.
Par Group C nung temaba jenjang angur telok shimtsü asoshi Venezuela teloki Mexico telok den tatembangba 1 buba round asaya asayatsü.
Ano külen, taoba Manchester United aser Real Madrid striker, Javier Hernandez-i asaya tenzüker minute 18 buba nung goal ka agütsüba ajanga asayamong tetenzükba asaya nung Uruguay telok madak goal 3-1 agi takok angur, Mexico teloki Jamaica telok den temaba jenjang ngua asaya.
Tesülen, asaya tenzüker minute 81 buba nung Hirving Lozano-i yanglutsüba pass ball agizüka, substitute asayar, Oribe Peralta-i par Mexico telok asoshi tanabuba aser takokba goal agüja par telok nem takok ngudaktsü.