Meyitemsü Naga “Yes I AM” Grand Finale nung tokteptsü renemer

Mokokchung, April 21 (TYO): Chuchuyimlang nunger tsüngsanger, Sp. Meyitemsü Naga, “Yes I Am” reality show mega audition nung takok ngua tang pa ‘grand finale’ nung shilem agitsü asoshi terenemshiba tulu nung lir. Grand Finale sentongji 2017 May ita Mumbai nung akatsü, ta angazüker. “Yes I Am” ya India nung sempet balala aketer tetoktepba sentong rongnung tulutiba ka lir.
“Nüburtem temeim aser teyaritep ajanga ni iba jenjang tashi tongdaktsüogo, tang ya ano wadang tuluba anünga alinung, maneni nenok sarasadem den vote ajanga yaridaktsünür”, ta Sp. Meyitemsü Naga-i mepishia metetdaktsüogo.
Nenoki iba link @Yesiamstar ajanga pa nem vote agütsütsü mepishir. Nenok kari danga Meyitemsu Naga den jembinüra E-mail– Meyitemsunaga@gmail.com, facebook account- Meyi temsu Naga mesüra Whatsapp– 8259921033 ajanga pa tongtettsü.
Arishi küm 22 tain, Sp. Meyitemsü ya lanur sempet balaka aketer rongnung ka lir. Pa arishi küm 10 asüdang nungi tsüngsangtsü tenzük aser pa taküm nung tsüngsangtsü tenzükbaji tongtibangsa “Step Up” movie repranger külen nungi balaka tejangra aru, ta iba osangbeneri pa den jembidang ashi.
“Naga nunger tsüngsangba luyim nung sempet aketerbo aika lir, aji saka, Nagaland nung tsüngsangba maparen dak sentakba nung nüngdakbatem (facilities) kecha mali, iba den ano tsürabur aikati iba luyim ya mangateter, ibayongji asenoki tangar memeneper”, ta paisa tebilemba ka ashi. “Tsüngsangba nung ya ngujem tulu lir aser ibaji perokshitsü nükjidong nung ni iba wadang ya shimtet”, ta paisa shisem.
“Asenok jashia alinunga tsüngsangba ajanga pelaa kümdaktsür aser ibai exercise tajung ka lir, anungji, tsüngsangba nung amajok kecha mali”, ta pai ashi.
“Animated robotic aitsü ni kanga jangrar aser ibaji kü indang style lir”, ta iba osangbeneri asüngdangba ka langzüa ashi.
“Iba show ya temer külen Mokokchung nung dance school ka lapoktsü bilemdar”, ta paisa inyaka aotsüba sentong ka lemsatep.
Yes I am reality show online audition ya 2016 December ita tenzük aser tetenzüklen Meyitemsüi online audition ana (2) tashi ajangtet aser mega audition nung takok ngur tang ya grand finale nung shilem agitsü ajangtetogo.
Iba show ya nüburtemi vote agütsüba nung tenem shilem (50%) aser judges-temi reprangba nung tenem shilem (50%) ta lemsar tendangtsü. Anungji, nüburtemi agüja aliba link ajanga vote agütsütsü mepishir.