Mezoma yimtsüng nung tzü benden dak ka lapoktsü

Dimapur, Yimpoksüi/November 12 (TYO): Water harvesting structure ka November 11 nü Mezoma yimtsüng nung lapoktsüogo. Iba tzü bendendak ya Kohima Forest Division-i senotsü teyari agüja Joint Forest Management Committee (JFMV) Mezoma-i yanglu.
Tzü bendena ayudak ka yangluba ya Kohima Forest Division, soil and moisture conservation program kübok water management component nung shilem ka lir. Iba tzü bendendak ya yimdaklirtem aser yimtsüng nung süngtong tila tem nem tzü agütsütsü asoshi nükjidong yur yangluogo.
Arem wazüka ayutsü atema yimdaklirtemi department den longjemer inyakba atema DFO Kohima, Rongsenlemla Imchen-i parnok dang pelaba metetdaktsü. Kasa mapang nung Ranger Kohima Range, Pezaneinuo-i water management aser jenjang aketba süngtong anepalutsü koda tongtiba iba indang jembia liasü.
JFMC-isa taküm nursery ka yangluogo aser yimtsüng temeket nung süngjangtong tapu balala aika temtsüogo, ta ketdangser sangdong ajanga metetdaktsü.