Mezüngbo ‘Quantico’ nung shilem agitsü nungnanga liasü: Priyanka

Quantico_PriyankaMumbai, September 27 (Agencies): American TV series “Quantico” ya Bollywood actress Priyanka Chopra atema tongtibang sentong ka lir saka lai iba sentong nung shilem agitsü atema mezüngbo memulungi liasü.
Priyanka-i “Gunday” film nung shilem agia alidang la “Quantico” nung shilem agitsü atema mezüng asüngdang.
Iba mapang lai “Mary Kom”, “Dil Dhadakne Do” aser “Bajirao Mastani” o “Jai Gangaajal” film tem nung shilem agitsüba liasü.
“Mapang talangka agitsü asüba agi ni mezüngbo nungnanga bilem. Television aser Hindi film tem atema mapa lemsatsübaji tasak asütsü amai bilem. Ajisüaka Quantico indang otsüji jangratemtsüka liasü aser iba jagi ni ma ta meshitet,” ta Priyanka-i osangbener dang ashi.
“Ni ‘Gunday’ nung shilem tagidak nung Kelly Lee kü den ajuruteptsü atema aru. Iba sülen ni Los Angeles-i ao aser idakji parnoki kü dang pilot 25 indang zünga metetdaktsü aser ni saklokbatem ashi,” ta laisa shisem.
‘Quantico’ ya Quantico, Virginia nung aliba FBI Training Academy nung Federal Bureau of Investigation recruits telok ka indang otsü lir.
Priyanka-i Alex Parrish ta ser tongti shilem agir aser iba nisungji ya FBI-i temulung melemtetertem rongnung tongtiba lir.
Deobar nungi US nung “Quantico” sayutsü tenzükogo aser India nunga October 3 nungi Star World aser Star World Premiere HD ajanga sayutsü.
India nunger actor tem Hollywood nung shilem agitsü atema Anil Kapoor aser Irrfan Khan nungertemi lenmang lapoktsü atema Priyanka-isa parnok nem tenüngsang agütsü.

You must be logged in to post a comment Login