Mezüngbuba Dimapur Art Festival tenzükogo

Eastern Art Council (EAC) aser Task Force for a music and Arts (TaFMA) na senteper Mezüngbuba Dimapur Art Festival ayongzükba, October 15 nü DMC administrator, Albert Ezung-i shop no 33, supermarket Dimapur nung lapoktsüba sülen tangokba noksa yangi angur.

Dimapur, Mongputeni/October 16 (TYO): Eastern Art Council (EAC) aser Task Force for a music and Arts (TaFMA) na senteper Mezüngbuba Dimapur Art Festival ayongzükba, October 15 nü DMC administrator, Albert Ezung-i shop no 33, supermarket Dimapur nung lapoktsüogo.
Sentepaaliba lokti den o jembidang Albert Ezung-i ashiba agi, art gallery lapokba nükjidong tongtibangtibaji art mimba ajanga lir. Paisa, iba art benjung ajanga local artists tem ajungkettsü ta ashiba den government department tem dang artist tem indang art alia parnok ajungkettsü mepeshi.
Paisa, local aser non artist tem longjemdakja sensak asemtsü, ajungkettsü aser külemi inyaktsü asoshi maongka agüja iba tasü tait jenjang agiba asoshi EAC Coordinator, Myingthungo Ababe Ezung nem tenüngsang agütsü.
Maneni pai lanur artist tem dang parnoki shimba mapang nung temaba jenjang tongtettsü asoshi meranga inyaktsü ajungshi. Paisa mapa ka shimbaji tongtibang masü saka pei shimba mapa nung temaba jenjang tongtettsübaji tongtibang aser wadang ajak nung tongtibangtiba olongji excellence lir ta ashi. Pai lanurtem dang pei ayonga aliba tesem nungi adoka mapa tasen nung ajemoka inyaktsü asoshi tasü itshitsü ajungshiba den iba benjung ajanga sabang tajung ka lapoktsür ta ashi.
Iba sentong nung artist parnok 37-i parnok indang art sayuogo. Maneni iba sentong nung “The environment I dream” nung ajemdaker art tetoktepba ka agi, kong school aikati shilem agiogo, ta DPRO dimapur sangdong ka ajanga metetdaktsü.