Mezüngbuba Foldable Smartphone January 2016 nung sayatsü

Seoul, September 16 (Agencies): South Korea nung tentetba shishilemba telok, Samsung-i mezüngbuba kelepa amshitetba smartphone sangküm, 2016 küm January ita alima dang sayatsü sentong renemba osang ka tanü Bodbar nü sangoktsüogo.
Taoba mapang curved edge display adenba Galaxy smartphone adokba Samsung teloki taoba küm 2 tejaklen nungi tenzüka tasa balala amshia yanglutsü tenzükba sülen tan mezüngsüa par foldable smartphone sayatsü sentong renemer lir.
Samsung teloki yangluba keleptetba smartphone, ‘Project Valley’ ya Qualcomm Snapdragon 620 aser Snapdragon 820 na desemba chipset ana den takok ngua tendangba osang jangjaogo.
Iba smartphone tasenba nung 3GB RAM inoksemba den külemi, kasaji micro sdcard amshia tuluba kümdaktsütsütettsüsa renema lir.
Ano külen Samsung-i tanü tashi alima dang mesayai aliba Galaxy View smartphone inch 18.4 display aketba tablet ka asütsü renemba osanga angazükogo.
SM-T670 ta ajaba tablet-ji Bluetooth SIG-i tendangba sülen alima dang sayatsü melaba osang jangjaogo.