Mezungbuba Jemtimenba Mollier Foundation senpet agutsuba sentong agiogo

JMF mezungbuba senpet agutsuba sentong nung takok angrtem den Wb.Jemtimenba Mollier(tabelen nungi pungobuba) aser JMF ludenpur tangokba noksa nung angur.

Mokokchung, Oct 28, 2019 (TYO) : Mezungbuba Jemtimenba Mollier Foundation (JMF) senpet agutsuba sentong October 26 anogo Whispering Wind, Mokokchung nung agiogo. JMF-i ASLB ajanga Arangtet Tatidang agiba nung takok angur parnok nem ya sen den kuli kaket yamai aguja liasu.
2019 kum Class 10 aser class 12 tatidang nung mark timtiba nguteta tematiba jenjang nguteter Sp.Nokzenketer. Mount Moriah School,Ungma aser Kr.Longjana Clark Memorial Higher Seconday School,Impur tena nem Jemtimenba Mollier Foundation-i sen meyi pungo(5000) den kuli kaket (certificate) agutsu.
Maneni JMF-isa ASLB-i ASLB ajanga Arangtet Tatidang agiba nung takok angur, ACT tenren nung Ist adoker Purtemjen Jamir, ADT tenren nung Ist adoker ana Temsujungla aser Tzuwazenla, par asem nem sen meyi pungo(5000) den kuli kaket (certificate) agutsu.
Mezungbuba Jemtimenba Mollier Foundation senpet agutsuba sentong nungtem nung arishi kum 30 aser temapur Olung Lutet tetoktepba agia liasu aser iba tetoktepba nung takok angur nem JMF-i Tematiba jenjang (Ist) Temsujunglai sen meyi ter(10000) den kuli kaket agizuk,Tanabuba jenjang(2nd) I.Zulu Imsong-i sen meyi pungo(5000) den kuli kaket agizuk aser tasembuba jenjang Pangernunglai sen meyi ter(3000) den kuli kaket agizuka liasu.
Iba sentong nung Ao Senden tongti zulur Wb.imtipokyim-i tajungshi o jembi, Ao Senden Literature Board Chairman Dr.L.Temjen Jamir-i tepela o jembi, JMF Convenor Dr.Tali Imsong-i JMF nukmen ratet metetdaktsu, sentong nungsa Mayangnokcha Govt.HSS kaketshirtemi temeja ken ka aten aser iba sentong JMF zungsem Wb.Aso Imsong-i ketdangsua ani. Sentong Aor lokti tentet balala, Mokokchung town nung tentet balala, School balala nungi Ao oshi tesayurtem, Mokokchung town anasatiba yim pezu Ungma, Khensa, Mokokchung aser chuchuyimpang nungi putu yimsusurtem aser yimtsu yimbu aika atenshia iba sentong kanga dang meraketketa agi.
Jemtimenba Mollier Foundation (JMF) Ao oshi ajungkettsu mangdang nung 2014 kum Mongchen nunger Wb. Jemtimenba Mollier kibongi sen lakh aika aguja tentet aser iba JMF ajanga 2014 kum nung asen tetsu oshi ajungkettsu asoshi mapatong balala inyaka odagi ,mapang balala nung tetsü oshi shisatokden, otsü nu zülutepba tetoktepba, Impur bible School nung pi kin asen oshi nung tajunger nem senpet agutsüba, tanela anir aruba mapa asen tetsü oshi ajanga osang tajung sangdongba asoshi Samaro kentener telok nem senpet agutsüba, Arangtet tatidang nung takok tajung angur nem senpet agutsüba, Class 10 aser Class 12 azünger Ao oshi nung Topper nem senpet agutsüba aser tanu ama tetoktepba sentong agiba ajanga asen tetsü oshi asoshi inyakdagi aser ano maneni inyaka aotsü asoshi Jemtimenba Mollier Foundation(JMF) nükjidong tulu lir.