Mezüngbuba Mokokchung XCE Dec. 10 nü akatsü

Dimapur, November 20 (TYO) : Mokokchung nung mezüngbuba cycling club, Trail Hounds Cycling Club (THCC)-i tan mezüngsüa Mokokchung jila nung ‘mountain biking’ tetoktepba ayonga akatsü renema lir.
Mokokchung Cross Country Eliminator (XCE) ya December 10, 2016 nü Mokokchung nungi kilometre 5 pilar aliba FAC Ground, Chuchuyimpang Yimtak akatsü renema lir.
Tourism ji terenlok aser tesem ka inlokdaktsütsü atema kanga tongtibang ta angateta tourism ajungkettsü aser temang anema aliyim tsütsü temulung agütsütsü mechi nung THCC ya taküm küm tetenzüklen tentet. Nüburtemi tejangraba tulu sayuba den THCC nungitba ajanga iba teloki Mokokchung XCE ayonga amungtsü mulungtet.
THCC züngsemtemi osangbenertem den jembidang ashiba agi, iba tetoktepba ya Union Cycliste Internationale (UCI) cross country eliminator yimya nung tokteptsü.
Convener Atoba Longkumer-i, khen nung nisung pezü tokteptsü aser parnok rongnung tekaraba ana shima tanabuba round-i yoktsü aser tanüba anaji tetoktepba nungi tugudaktsütsü. Iba tetoktepba ya tejangrar ajak atema lapoka lir aser ibai telemsa ana nung tokteptsü — Elite Men’s Category aser Open Junior Category. Shilem aginer aser tejangrartemi temetettsütem, tsüzüng ozüng aser koba yimya nung tokteptsü item osang ajak Trail Hounds Cycling Club indang Facebook official page nungi download sütettsü mesüra Ph. No. 8257062268 ajanga Competitors Relations Officer den jembitsü akok, ta metetdaktsü.
Meter 1200 Mokokchung XCE tetoktepba nung Dry & wet dirt, obstacles courses, jump sections, rock garden aser surfaced road tem alitsü.
THCC ya sen ajangzüktsü atema tentenba telok ka masü aser sorkar dang nungia sen magir. Mokokchung nung mezüngbuba MTB tetoktepba katettsüsa tenla agüja nungitertem dang sentong ayongertemi kanga pelaba metetdaktsür.
Iba tetoktepba nung adentsü tenüng züluba mapa ajak November 30, 2016 nü shibangtsü. Mokokchung nung mezüngbuba packaged drinking water yanglur, Misty Drops, Firefox Bikes, Hotel Metsüben, Little Village Cycles, Soyim Printers, Little Star Entertainment, Aircel, IDBI Bank aser Zeta FX Home Studio temi iba sentong atema sen teyari agütsür aser iba sentong atema Hospitality Partner ji Chuchuyimpang Village Council lir. Iba sentong nung Nagaland Parliamentary Secretary for Tourism, C.Apok Jamir chief patron asütsü.
Onoki pa den majurutep saka C.Apok Jamir-i pasasa iba sentong nung chief patron asütsü mulungteta aru, ta sentong ayongertemi ashi.