Mezüngbuba Nagaland Music Industry Stakeholders Conclave agitsü

June 17, 2019 nü Kohima nung tayongertem aser kentenertem külemi agiba noka angur.

Kohima, June 17 (TYO): Nagaland sorkari World Music Day tenüng nung Nagaland Music Industry Stakeholders Conclave ka ayongzüka agitsü.
June 21 nü agitsü aliba sentongji RCEMPA, Jotsoma nung agitsü. Iba sentong ya Department of Youth Resources and Sports kübok Music Task Force (MTF)-i ayonga agitsü.
“World Music Day nung mezüngbuba conclave ayonga agitsü. Naga nungertemi kentenbaren kanga meimer aser iba jagi iba sentong kanga junga agitsü renema lir,” ta MTF Project Director Hovithal Sothu-i ashi.
Iba Conclave nung mezüngbuba session ji anepdang 11:00 ako nung tenzüktsü aser alakteta jaokerji Youth and Sports Resources Advisor Zale Neikha asütsü. Iba sülen kentenba sentong nung Rural Development Advisor, Dr Neikiesalie Kire aser open mic sentong nung Secretary YRS Lhouchalie Viya na jaoktsü.
Anüngdang workshop balala agitsü aser iba mapang kentenbaren nung shilem agirtemi pei tebilembatem lemsateptsü akok, ta Hovithal Sothu-isa ashi.
Workshop mapang Music Academy Kohima Director Khyochano TCK-i ‘Music education’, Sümi Baptist Church Kohima Music director of James Swu-i ‘Choir’, Rattle and Hum Society Director Theja Meru-i ‘Artist Management’ aser Audio Garage Proprietor Atsung Jamir-i ‘Production’ onüktem lemsateptsü.
June 21 nikongtsütsü 2:30 nungi 4:00 ako tashi Open Mic sentong agitsü aser iba sülen 5:00 ako nung kentenba sentong tenzüktsü.
Taküm October ita MTF-i Eastern Nagaland kübok district tem sema senzütsü aser idangji sound managements, music training, vocal training amala indang workshop tem agitsü, ta Hovithal Sothu-i ashi.
June 21 nü music donation drive ka tenzüktsü aser iba nung bendenbaji Eastern Nagaland tour mapang sensaker nem agütsütsü, ta paisa shisem.
June 21 nü kentenba sentong nung band 17 aser RJs 60 tashii shilem agitsü, ta paisa ashi.