Mezüngbuba Nagaland Olympic tanü nungi tenzükogo

Dimapur, December 12 (TYO): Mezüngbuba Nagaland Olympic, mongulbarnü nungi tenzükogo. Iba asayamung ya Nagaland Ang, PB Acharya-i DDSC stadium nung tenzüktsü.
Anogo pongu nü asayatsü aliba iba asayamung ya Nagaland sorkar teyari nung Nagaland Olympic Association-i ayongzükba asayamung ka lir.
Angi ashiba agi, iba ya Nagaland otsü nung kanga dang tongtibang sentong ka lir, aser iba asayamung nung shilem agirtem ajak dang tajungtiba nung asayatsü asoshi ajungshiba den Nagaland ya tangar den tekübokba jenjang nung masü saka kasa jenjang nung dang lir ta ashi. Pai maneni iba asayamung kanga junga ayongzükba atema Nagaland sorkar aser MP Neiphiu Rio tenüng asang.
Iba sentong nung tetushi tesemdangertemji, Nagaland Olympic Association Founding President aser State sports awarded, Er. Lanu Toy, Olympian aser Arjuna Award ngur alila, Chekrovolu Swuro, Dr.T.Ao’er semchir aser Naga nunger rongnungi mezüngbuba olympian, Miss Ningdangnaro nunger liasü.
Iba asayamung nung Nagaland nung district 11 nungi asayar parnok 1000 dak tema asaya balala nung shilem agidar. Iba asayamung nung asayatemji: Volleyball, football, wrestling, wushu, taekwondo, table tennis, lawn tennis, badminton, boxing, archery, athletics aser sepaktakraw nunger alitsü.
Iba sentong nung district captains tem kulizüngtepba, international wrestler Keduovilie Zumu lenisüba kübok aka. Maneni sentong nung Maple Tree school nungi kaketshirtemi, Faith in Action, Tetso Sisters, Naga Folklore group, Akhrole Keyho, Ethnic Future, Epicon, Lords of Rock aser tanga lokti temi shilem balala agiba ajanga lokti peladaktsü.
Football asaya Bodhbarnü nungi Chumukedima police complex, nung asaya tenzüktsü kong Group A nungi mezüngbuba asaya Phek aser Wokha na asayatsü aser iba sülen Mon aser Tuensang na asayatsü. Brehostibarnü Kohima aser Peren na asayatsü.
Group B nung Brehostibarnü Dimapur aser Mokokchung na asayatsü aser iba sülen Longleng aser Zunheboto na asayatsü. Kiphire pur bye nung tanabuba round-i iogo.
Final asaya December 16 nü 1:00 ako nung asayatsü aser kasa anogo nung 10:00 ako nungi tenzüka tasembuba jenjang atema asayatsü.