Mezüngbuba tetsür SWAT telok nung NE nungi parnok 36 lir

Guwahati, Luroi (August) 15 (Agencies): Tawa India nung mezüngbuba tetsür Special Weapons and Tactics (SWAT) telok tentetba nung northeast nungi commando 36 dena lir.
SWAT team nung Assam nungi commando 13, Arunachal Pradesh Sikkim nungia aser Manipur nungi pungugu, Meghalaya nungi 4, Nagaland nungi 2 aser Mizoram o Tripura nungi kaka dena lir.
Independence Day matongdang Delhi Police-i all-woman SWAT team ji tenteta liasü.
“Tebur commando tajungtemia item tetsürtemi inyaktetba ama meinyakteter” ta Delhi Police ketdangser kati osangbener dang ashi.
Northeast tesem nungi tetsür commando tem ya ita 15 tashi weapons handling, counter-terrorism, military self-defence technique training agi. Training ji Israel indang security forces nungeri amshiba yimyatem indang liasü.
Iba sülen tetsürtemji Special Weapons and Tactics (SWAT) team- Krav Maga nung züngsem aküm.
Iba unit ya India nung SWAT team trokbuba lir.
Delhi Police Special Weapons And Tactics (SWAT) unit indang Women Commandos-i uniform tasen ka asemer aser ibaji fashion designer Ashish Soni-i design asüba lir. Uniform indang colour aser pattern ji Police Commissioner Amulya Patnaik-i shim.
Tetsür commando temji interventions, counter ambush aser VVIP security nung mongintem lir.