Mezüngmeshidaktsüba mapa ka

Kodang asenoki state nung ochimashiba mapa anema ola madoker, ochimashiba mapatem jagi asenok mezüngmeshitsü tenzüktsü aser oda-oda ochimashiba larji asenok akümtsü. Tanü Nagaland nung Food and Civil Supplies department ajanga Delhi nungi asenok asoshi jangotsü alemtsü yokba parnok sünütsü süa küm aika yutsüogo. Ashiko, Nagaland nung Food & Civil Supplies reprangba ketdangser tulurtemibo Naga nungertem ya onsara taremzük aser nisung tajung tesa-a ta bilemdar asütsü, kechiyong Naga nungertemibo parnok angutsüba jang, shini aser kerosene manguyonga ola madoker. Aji oda, parnok asoshi Delhi nungi yokba jangotsütemji seret nung sen ana asem agi alitsüba kasa janga dokan nung sen semer lir agi alir ser nung ola madoki aremzükbaji, Supply nung inyaker tulurtemi dang masü saka jang bener arutsür aser agizüka yutsür tsümartemi kanga menüja bilemdar asütsü. Aji oda, tang Dimapur nung ACAUT teloki Supply (PDS) jang ki tulu ana nung bag meyirijang ana asem asepba bosta melener asenok dang dokan nung ayoktsü asoshi renemja aliba apuba jagi Naga nunger nübortemi tenük  tuluka saaker Naga nunger tulurtemi dang masü saka tsümar takartemi asenok mezüngmeshiba mapatemji khen jungjunga reprangtsüla. Atangji, ACAUT teloki ashiba amaji, iba  tashiji asenok anema ochimashi mapa inyakba putetaka, police-temi Naga nunger tulurtem aser tsümar takartemji aputsü arendaktsü, kechiyong parnokji tashi tulu aliba nisungtem lir. Parnoki Naga nungertem ashioktsüba nungi anguba senotsü tajangzüktemji Naga nunger tulurtem den lemsaa alitsü aser ano parnok ket nungji tetsübutsü nisung tamajunger aika yua alitsü. Parnok jagi Naga nunger ka dang sen ishika agütsür Naga nunger ka kasetdaktsütsü koka lir. Iba tashiji tangar nem asenok mezüngmeshidaktsür. Asenokbo asen tim tangutsü shilem manguba agi ali nung anak auyi menaka senzür saka asenok jangotsü yoka takar akümertembo anüngdak tuagi jangratema alir. Item jagi asenok tesensakba tesensakba kümdaktsür aser asenok koda masüba tia nung lia asenok meyong sen agi asen meyong ali aser kiojen alizüker. Iba tashiji tulurtemi aser asen sen agi akaba tsümar takartemi asenok mezüngmeshir. Ajisüaka, iba dang nungi tejashitsü tulutibaji asenoki item mezüngmeshi ajakji aremzüker. Mizoram nungbo ita ka supply nungi pei tangutsü tim jangotsü mangu nung, nübortem adenshir Supply minister mesüra Secretary mesüra Director kima adenshia kuli meshitsü. Atangji, Naga nunger aika supply nungi jangotsü menguaka timmatemtsüsa lir saka ano asüngnep kechi sorutsü ta bilema aonunga tebok tazüng yipteni air aika lir. Shitakba agibo, item jagi India government-i Supply department ajanga parnok asoshi jenjang kanga dalang agi jangotsü ayokba sentongji memeteti alinunga, rasaa shir parnok atema yokba teyariji shitak agüja yaritsüla. Ajisüaka, tanübo tulurtemi tilar aser sensakertem yaritsü melen parnok tenüng nung aruba teyaritem tsümartem den lemsatepa agir aser iba jagi takar akümer. Temulung ashitsü kaji, sensakertem sen agi takar akümertem dangi kasa sensakertem meshimetsüi aor aser ano election mapang ama nungbo sensakertem sen agi sensakertem vote alir. Item tiaji jungjunga bilemdangra, jepaka nüktzü malu temulung ayangtsüka lir. Iba ama tangar nem mezüngmeshidaktsübaji kenü ochimashi tilaka atalokdang ola madoki toktsüba ajanga tenzükba tebilemtsütem asütsü. Asenok meyong jang seret nung senpak 3 agi alitsüba jang kasato dokan nung asenok dang sen 35 yong ayoker aser ibaji pelashishia alia chiyonger, asenok tenüng nung yokba wheat, shini aser kerosene agi Naga nunger tulur kar den tsümartem manger sangwa nung mejungketa akar. Asenok atema yokba kerosene petrol nung meyokteper asenok dang ayoker saka asenoki ola madoker. Alima nunga nisung tajung taremzük aser matumara yamai ali no (?) ta, talisa, tsümartemi bilema alitsü. Asenoki asen adianu kaseta toktsütsübo mapayur saka asen meyong jangotsü aser senotsü miimzüka agiba ajanga asenok timtemdaktsübabo aremzüker. Ibai tesüngmangtsü, asenok ya asangsang nung masü pongmang lima nung alir, asenok saaktsüla aser ochimashi anema ola adoktsüla  !