MGHSS pur platinum jubilee asoshi mazüngi renemshidagi

Mokokchung, September 10 (TYO): Mayangnokcha Government Hr. Sec School tenzüker küm 75 ajungba jubilee mung sentong koba September 16, 2016 nü ayongzüka lir, iba asoshi mazüngi renemshiba maparen balala inyaktepdagi.
Jubilee nüngtem nung Sept 9 aser 10 anogotem nübudoka mungogo. Iba nübudok sentong nung taoba mapang zünga alirtem dena arua yaritepa liasü.
MGHSS principal Arenlai osangbenertem den jembidang, jubilee nüngtem nung school kitem yanglushiogo ta ashi. Taoba mapang iba school nung azünger Dimapur nung aliba alumni-temi jubilee nüngo kaket adoktsür aser Kohima alumni-temi tang aliba school library-ji e-based library jenjangi ajungketsü asoshi teyari agütsü, ta laisa shisem.
Mokokchung nung aliba alumni-temi science labrotary jenjang tajungba kümdaktsütsü asoshi teyari agüja liasü, ta laisa ashi. Laisa alumni-temi maparen balala nung yaritepba asoshi pelaba den taoba mapang iba school nung azünger aser inyaker ajak jubilee mung nung arua adentsü asoshi pelashishia jaokba laisa ayongzüka metetdaktsü.
2011 batch of commerce kaketshirtemia PA system ka agütsüba asoshi laisa pelaba den iba system-ji Sept 14 nüji meshitettsü sentong renema aliba laisa shisem.
Platinum jubilee luden nung mendenbula Mokokchung ADC, Bendanglilaia jubilee renemshiba maparen nung CAWD-i nungitba den ano Ao Kaketshir Mungdang (AKM)-i MGHSS nung tzü ajemtsü filter ka amenoktsüba asoshi pelaba lemsatepa liasü.
Iba jubilee sentong aginüji (16th Sept.) nisung ajak anepdang 9:45 ako tashi nungbo menseper lidaktsüner, ta sentong achaayangertemisa mepishia metetdaktsü. Iba sentong temer külen ‘alumni meet’ ta sür taoba mapang azüngertem ajurutepba sentong balaka alitsü, ta parnokisa shisem.
Jubilee sentong ya tang tesüdak school auditorium nung alitsü aser Sept. 16 nüji Nagaland School Education & SCERT minister, Yitachu tongti tesemdanger asütsü jaoka lir.