MGNREGA atema sen crore 1188 tema agizükogo: ACAUT

Dimapur, August 19 (TYO): Nagaland nung Council of Ministers aser MLA temi senpong nung sen mali ta ashibaji khenyongi tiyazü, kechiyong 2016-17 atema MGNREGA payments atema kija sen 1188,79,10,000 agizükogo, ta ACAUT Nagaland-i sangdong ka nung metetdaktsü.
MGNREGA atema sen crore 1188, lakh 79 ser meyirjang 10 agizükogo ta Finance Department (FD) ajanga osang shiogo. April aser October 2016 tsüngda sen 591,10,80,000 agizük aser 2016-17 atemasa May 1, 2017 nü sen aika agizük. Nagaland nung aliba yimtsüngtemi küm nung nisung shia anogo 100 taa agütsütsüba nungi anogo 3-4 indang taa dang agütsüba atema nemnemteper, saka Finance Department aser RD Department purbo senma nung mejanga lir, ta Media Cell sangdong nung shia lir.
India sorkari sen paikaji agüjaka, Rural Development Department-i küm nung anogo 3-4 indang taa dang agütsüba atema ratar. Ano külen, Finance Department-i double withdrawals asür amai kulikaket kar nung ajitetogo, ta ACAUT-isa ashi.
2016-17 MGNREGA programme atema department-i sen lemzüktsüba osang tejangja Finance Department-i agütsütsüla, kechiyong sen crore 1188 sayuba dang nungi talila agizüka alitsü amai bilemer ta ACAUT-isa asüngdangogo.
Nagaland Chief Minister-i Finance Department indang in-charge bena lir, anungji pai Naga nunger dang, yimdaklir nem anogo 3-4 atema dang taa agütsüba kuli den sen tanüngba paikaji kong amshiar kuli tejangja agütsütsüla, ta ACAUT Nagaland-isa metetdaktsü.