MGNREGA kübok 50 nü tali mapa inyaktsü sorkari agizükogo

New Delhi, September 16 (Agencies): Mahatma Gandhi National Rural Employment Guarantee Scheme (MGNREGs) kübok aluyimer/aayangertem anogo 50 tali mapa inyaktsü atema Bodhbar nü Central sorkari agizükogo.

New Delhi nung Union cabinet senden ka amenba mapang, tan mongpu nung tzünglu junga maruba ajanga takoksa ajurur aluyimertem tangbo MNREGS kübok anogo 150 nü mapa inyaktsü lemteta liasü.

Rural employment guarantee scheme ajanga tamalen anogo 100 aayangtsü asoshi maongka agüja liasü aser tang anogo 50 tali bendenloktsüogo.

Tanü osangbenertem senden ka nung jembidang Telecom Minister Ravi Shankar Prasad-i, “Linük nung taküm agi atonga küm anabuba tzünglu junga maruba ajanga rongsenkettsüng nung timtem ajuruba koktettsü atema sorkari mapa inyakba anogo 100 nungi 150 kümtsütsü telemtetba agiogo,” ta ashi.

Linük tesem aika nung tzünglu junga maruba dak sentakba nung Hombar nü agriculture ministry-ia yimtsüng scheme kübok anogo tali mapa inyaktsü maongka agütsütsü, diesel totzü subsidy agütsütsü aser metsüngjang subsidy agütsütsü sangdonga liasü.

“2015 Kharif mongpu nung tzünglu junga maruba nung ajemdaker aluyimertem nem tajangzük agütsütsü atema sorkari mera aika agiogo. Item mera tetuyuba state sorkar ajak nem metetdaktsüogo, aser itemji pei nüngdak apir inyaktsü,” ta Hombar nü agriculture ministry-i sangdong ka ajanga metetdakja liasü.

MGNREGS ya September 7, 2005 nü nungi mapa küma inyaker aser iba scheme kübok temepishiba agütsüba sülen anogo 15 tsüngda sen aatsü atema mapa agütsür.