MGNREGA taa memenui agütsütsü SC-i tuyur

New Delhi, November 02 (Agencies): MGNREGA scheme kübok aayanger nem sen mapang shitak nung magütsüba dak sentakba nung temepishiba onük ka angadangba sülen Hombar nü Supreme Court (SC)-i sorkar dang iba scheme senotsü mapang shitak nung agütsütsüla, ta tuyuogo.
“State tem mejanga aliba nungi saktsüla aser senotsü mapang shitak nung agütsütsüla,” ta Chief Justice HL Dattu aser Justice Amitava Roy nati akümba SC Bench-i ashiba den külemi Ministry of Rural Development nem-a notice ka agütsüogo.
Iba onük nung advocate, Prashant Bhushan-i ano maneni onük benokba mapang ibaji tom nung sota bench-i, “Iba ya taa aser senotsü agütsütsü menoba indang lir. Onoki onük kecha mangadangi notice agütsüogo. Nai ano onük benoknüa lira ibaji taruba mapang angadangtsü atema yuang,” ta ashi.
RTI activist, Aruna Roy, social activist, Nikhil Dey aser taoba mapang sorkar mapa inyaker, Lalit Mathur nungeri Independent Social Audit Units tentettsü aser Minimum Wages Act kübok minimum taa dang nungi NREGA kübok indexing wage rate timba akümtsü atema temepishiba ka benokba SC-i angadanga liasü.
Temepishiba benokertemi Mahatma Gandhi National Rural Employment Guarantee Act (MGNREGA) inyakyim nung meshitak lir aser India yimtsüngtem nung nüburtem takum alitsü indang nükjidong ajak sentokogo, ta benoka liasü.
Iba Act kübok Section 22(1) ajanga Centre-i aayangertem taa atema senotsü agütsütsü ozüng lateta lir aser yimtsügntem nung aayangertem taa magütsüi aliba sen crore 3,100 jungogo. “Iba Act kübo temzüngtem maneni alema inyaker, aser mapa inyakba atema senotsü agütsütsü nung tamakok ngua lir,” ta parnokisa ashi.