MH17 lendong atalokdaktsürtem merenshitsü nangzüker: Turnbull

London, September 29 (Agencies): Ukraine anüdoklen Malaysia flight 17 tayimtsü anüng tom nungi kazüka yokertem nem tapet temerenshitsü agütsütsü tenangzükba olen ka Australia Ato Kilonser, Malcolm Turnbull-i tanü, Brehostibar nü metetdaktsüogo.

Russia nung yangluba Buk missile system Ukraine tonga bener aoba sülen kasaji amshia, MH17 tayimtsü anüng nungi kazüka yokba kuli ngutetba osang Joint Investigation Team (JIT)-i alima dang metetdaktsüba sülen Turnbull-i iba lendong atalokdaktsürtem merenshitsü atema nungdakba maparen inyaktsü tenangzükbaji sangoktsür lir.

“MH17 tayimtsü anüng nungi kazüka yoka, lendong atalokdaktsürtem nem tapet temerenshitsü agütsütsü nangzüker aser aibelenertem bushia parnok aputsü maparen bendanga agüja inyaktsü asoshi Russia maneni ajungshitsü renema lir,” ta pai ashi.

Küm 2 tejaklen nungi tenzüka tayimtsü anüng nungi kazüka yokba lendong den sentakba bushisüngdang agiba sülen, iba lendong atalokdaktsüba maparen nung nisung 100 shi shilem agiba osang JIT teloki bushitetogo.

2014 küm atalokba lendong nung Australia senso nisung 38 tashi densema, tayimtsü nung amener nisung 298 prongla asü.

“Malaysia Airlines meyong tayimtsü anüng nungi kazüka yokba den sentakba onük Russia Tir, Vladimir Putin den tawa benoka jembia liasü,” ta Turnbull-i shisem.

Ukraine sorkar anemertemi tayimtsüji kazüka yok ta benokba onük magizükba den külemi, iba maparenji Ukraine mitkartemi inyak asütsü akok ta Russia-i taoba mapang metetdakja lir.

Ajisüaka, Russia nungi Ukraine anüdoklen tonga bener orr Buk missile amshia tayimtsü kazüka yokba sülen missile system-ji Russia-i tanaben bener oadokba kuli tan ngutetba osang ka JIT-i yashi sangoktsüogo.

Netherlands sorarki ketdangsüa tentetba JIT telok nung Australia, Malaysia, Ukraine aser Belgium nungi bushisüngdangertem densema lir.