MH370 tayimtsü bushitsü atema drone amshitsü

Canberra, October 19 (Agencies): Tzüyim telung nung jajatetba aser nisung memeni jajadaktsüba drone amshia, samar monguteti aliba Malaysia Airlines Flight 370 tayimtsü bushitsü sentong renemba osang ka Australia-i metetdaktsüogo.
Sonar amshia, tzüyim tarok nung osettsüset bushiba rong nung drone-ji amshia, tayimtsüji bushitsü renemba osang ka Australia’er Transport Safety Bureau (TSB)-i tanü, Bodbar nü metetdaktsü.
“Remotely Operated Vehicle (ROV) ta ajaba drone amshia, video-tem tangoka tzüyim tarok nung tayimtsüji bushitsü. Tsüngsang mupong majungba ajanga tayimtsü bushitsü maparen nem aiben tetsükdakba bener arutsüogo saka tan ROV amshiba ajanga taoba mapang ajuruba tetsükbatem majurutsü imlar,” ta TSB-i osang jangjashitsü.
Tayimtsü bushitsü mapatongji sonar osang 20 shi bushiteta alidak, Australia anülulentip tsütsü tzüyimkümlen agitsü renema lir.
Kaula Lumpur toktsür Beijing bushia aodang nisung 239 tashi aniba Malaysia tayimtsüji küm 2 tejaklen, 2014 küm March ita 8 nü sama.
Taymtsü samaba sülen tayimtsü tsükokdak ta temulung melemi bilemdak, Australia tzüyimkümlen alima linük aikati aroki lungjemer tayimtsüji bushi saka tanü tashi tayimtsü den sentakba osang bushiteta mali.
Tan tayimtsü bushitsü tesem, square-kilometer 120,000-ji sangküm, 2017 küm February ita tashi nung tembanga agitsü sentong aliba osang ka TSB-isa metetdaktsüogo.
Tan agitsü renemba tayimtsü bushitsü maparenji tembangba sülena tayimtsüji mongutetra, tayimtsü den sentakba osang tejangja mongutet tashi tayimtsü bushitsü maparenji anenadoktsü telemtetba ka China, Malaysia aser Australia sorkari agiogo.