Aizawl, July 02 (Agencies) : Ministry of Home Affairs (MHA), Joint Secretary (North East) Satyendra Garg-i tanü Honibarnü Mizoram-Tripura-Bangladesh arrtsülen aliba Mamit district, Mizoram nung aliba Damdiai yimtsüng semdanga yangji aliba Bru kin lenirtem den züngsemtem ajurua liasü. Iba tesem nung aliba Bru kin ya Tripura nungi Mizoram-i aridokba kin ka lir.
MHA ketdangser den külemi arusang, State Home department, Additional Secretary Lalbiakzama-i, Bru kin lenirtemi parnok tebilemtsütem sorkari tekaratiba nung bentettsütsüla ta ashiba Garg-i kanga tenoka angaogo, ta ashi.
Bru Coordination Committee (BCC) nung mendenbuba Elvis Chorkhy-i, “Garg-i Tripura nungi aridokba Bru kin nungia züngsem kar dena Monitoring Committee ka tenteta Bru kin tebilemtsütem asadanga bentettsü atema lenmang bushitsü shiogo,” ta Press Trust of India (PTI) dang phone ajanga ashi.
Chorkhy-i, “BCC-i Centre dang Mizoram sorkar aser Bru National Liberation Front (BNLF) na tsüngda 2005 küm angatettepa sign sütepba den sentaktepa ‘Special Development Program’ ka tenzüktsü atema takhangba agütsüogo,” ta ashi.
BCC-isa, Bru kin nungi kibong shia nem sen 80,000 alang rehabilitation aser resettlement teyari agüjang aser tang parnok nem khen atema alitsü agüja aliba ki ajakji semi-permanent ki kümjang, ta Centre nem temipishiba ka agütsüogo.
“1997 küm Mizoram toktsür aoer Bru kin indang ali tebilemtsü nung telangzüba nüngdaker aser Bru kin aliba tesemtem nung Central School tem lapokjang ta onoki mepishir kechiba süra parnok kaketshisatsü peria mangur,” ta Chorkhy-i ashi.
You must be logged in to post a comment Login