Mhasilhousie ASA Wrestling champion kümogo

Dimapur, February 11 (TYO): Western Angami Sports Association (WASA)-i 44 buba Wrestling Meet Angami Sports Association (ASA) melangteptsü tetoktepba nung temaba jenjang 4 prongla ngua otsü tasen ka Kohima nung tanü, Brehostibar nü yangluogo.
Jotsoma nunger arishi küm 24 tain Mhasilhousie Nagi-i Khonoma nunger Rovilhoulie Pier madak final asaya nung takok ngua temang touzük seret 80 taret shilem nung champion aküm.
Mezoma nunger Zasevikho Meyatsu aser Zasevituo Chüsi nati tasembuba aser pezübuba jenjang angu.
Champion, Mhasilhousie-i senpet sen lakh 1.40, Rovilhoulie-i sen lakh 1, Zasevikho-i sen 80,000 aser Zasevituo Chüsi-i sen 50,000 agizüka liasü.
Chakro ASA, Northern ASA, Southern ASA aser Western ASA nunger densema ASA kübok densemba tsükong 4 prongla nungi melangteper nisung 72-i tanü Naga nunger yimya nung melangtepba tetoktepba nung shilem agi.
Tan asayamong lapokba sentong nung Nagaland Legislative Assembly Speaker, Chotisuh Sazo tongti tesemdanger liasü.
Asüng, Hokolbar nüa free style melangteptsü tetoktepba agitsü ayonga lir aser asüng 12:00 ako nungi tenzüka agitsü renemba asayamong shibangba sentong nung Nagaland MLA & Chairman, Nagaland State Mineral Development Corporation Ltd., Dr. Neiphrezo Keditsu tongti tesemdanger alitsü.