Mhasilhusie heavyweight champion aküm; King of the Ring tanü asayatsü

NagaWrestleMania 5 Heavyweight shilem nung takok angur, champion, Mhasilhusie Nagi; Keduovilie Zumu, Menuosetuo Yiese aser Pfusato Tetseo (Abelen) aser Junior shilem nung takok angur, champion, Mhasinyiizo Peseyie; Abizo Nakhro, Pusing H. Lungalam aser Kuthovezo Medeo (Achijilen) nungeri sempet/senpet agizükba sülen Kohima Local Ground nung agiba noksa ka yangi angur. (Kohima, October 28)

Kohima, October 28 (TYO): Kohima kübok Jotsoma nunger Mhasilhusie Nagi-i temaba jenjang ngua, NagaWrestleMania 5 (King Of The Ring Series 2016) Heavyweight champion tanü, Hokolbar nü kümogo.
3E Nagaland-i ayongba melangteptsü tetoktepba final nung arishi küm 24 tain Mhasilhusie-i Keduovilie Zumu tsükdakja, tan takokbaji ajangzükba sülen senpet sen 50,000 agizüka liasü.
Tanabuba jenjang angusang, arishi küm 30 tain Razouvolhoulie-ia senpet sen 30,000 agizükba aser semifinal asayatsü jenjang ajangzüker, Menuosetuo Yiese aser Pfusato Tetseo naprongla nem senpet sen 10,00 agütsüba osang jangjaogo.
Junior shilem nung Jotsoma nungersa, Mhasinyiizo Peseyie-i champion küma, paia senpet sen 10,000 agizüka liasü.
Kasa shilem nung tanabuba jenjang ajangzüker, Abizo Nakhro-i senpet sen 5000 aser semifinal asayatsü jenjang ajangzüker, Pusing H. Lungalam aser Kudesuhyi Medeo napronglai senpet sen 2000 agizükba osang angazükogo.
Ano külen, tan asayamong tatembangba tetoktepba, King Of The Ring Championship tan October ita 29 anepdang 10:00 ako nungi tenzüka asayatsü ayonga lir.
Iba tongti tetoktepba nung melangteper nisung 45 tashi shilem agitsü renema lir aser champion akümer melangteper nem senpet sen 1,20,000, tanabuba jenjang angur nem senpet sen 60,000 aser semifinal asayatsü jenjang ajangzüker 2 nem senpet sen 30,000 agütsütsü renema lir.