Mhasilhusie King Of The Ring champion kümogo

King of the Ring champion, Mhasilhusie Nagi-i külem takok angur, Pfusato Tetseo, Vekutho Soho aser Khoveto Lala; Nagaland Parliamentary Secretary, Khriehu Liezietsu aser asayamong ketdangsertem den aroki agiba noksa ka yangi angur. (Kohima, October 29)

Kohima, October 29 (TYO): Kohima district kübok Jotsoma nunger Mhasilhusie Nagi-i temaba jenjang ngua, NagaWrestleMania 5 (King Of The Ring Series 2016) champion tanü, Honibar nü kümogo.
Tan Hokolbar nü NagaWrestleMania 5 heavyweight champion akümsang, Mhasilhusie-i final asaya nung Pfusato Tetseo tsükdakja, tan champion akümtsü jenjangji ajangzük.
Aso tar feet 5 ser inch 10 talang aser temang touzük seret 90 taret, Mhasilhusie-i takok nangri o kulikaket den senpet sen 1,20,000 agizük aser Pfusato-ia tanabuba jenjang kulikaket den senpet sen 60,000 agizüka liasü.
Ano, Khoveto Lala aser Vekutho Soho nati tasembuba jenjang aroki abentsü jenjang angu aser tenaprongla nem kulikaket den senpet sen 30,000 agütsü.
Lightweight aser heavyweight shilem nungi melangteper 34 tashi King of the Ring takokba atema toktepa shilem agia liasü.
Ano külen, 2014 & 15 densema, heavyweight champion 2 ben tashi akümba aser King of the Ring champion 2015 küm akümba nüngtem nung Vechita Khesoh nem “Nagawrestlemania Hall of Fame – Class of 2016” Award agütsüba osang jangaogo.
Nagaland Parliamentary Secretary, Youth Resources & Sports, Music Task Force & State Lotteries, Khriehu Liezietsu-i takok angur nem sempet/senpet agüja liasü.
Ano külen, tan asayamong den sentaktepa agiba donors raffle draw nung Ticket No. 0264 shimteta, Bike agizüktsü temeten anguba aser sempetji anogo 3 tsüngda nung arua agizüktsü osang ka asayamong tayongeri metetdaktsüogo.