Mhonlumo anentsüba atema Lotha Hoho-i CM nem kuli agütsür

Dimapur, November 1 (TYO) : Nagaland Chief Minister, T.R. Zeliang-i October 28, 2016 nü Parliamentary Secretary, Mhonlumo Kikon menden nungi anentsüba atema Lotha Hoho-i sangdong ka nung onük kar jangjashitsü.
Lotha nunger taginüba anema meinyakra, Lotha Hoho-i yimten mapa nung tebang maier aser ano TR Zeliang mesüra tanga lennir shinga anema tebilemba kecha mali. Ajisüaka, Mhonlumo Kikon anentsüba atema mepelar, ta LH sangdong nung shia lir.
Lotha Hoho-i PIL benokba onük nung ajemdaker Mhonlumo Kikon PS menden nungi anentsü ta media osangtem ajanga angashir. Ajisüaka, Mhonlumo Kikon-i LH den NP & NG 2012 Regulations & Rules indang onük kodanga benoka mejembi aser LH-i benokba PIL nunga pa sendaktepa mali ta jangjashitsür, ta Lotha Hoho Chairman, Mhao Humtsoe aser General Secretary, Er. Mhondamo Ovung nati sangdong nung shia lir.
Mhonlumo Kikon anentsüba atema Chief Minister-i kuli kecha magütsüi lir. Anungji, pai iba kuli tejangja metetdaktsütsüla. Lotha Hoho-i PIL benokba atema Mhonlumo menden nungi anentsü süra, kechiba tang aliba DAN Ministry-i iba PIL yamai meyipa agidaktsünür ta onok ratar, ta Lotha Hoho mendenpurtemisa ashi.
PIL ka benokba sülen tatembang kati maru tashi PIL ji agientsü makok ta Supreme Court-i jangjajangja shia lir. Anungji, kechiba Lotha Hoho-i PIL agientsü mesüzüktsü atema mapang, nübo aser rongsen endoker? Talisa, Lotha Hoho-i benoka aliba PIL ji Naga nunger taginüba mesüra Arla 371A anema masü, ta sangdong nungsa shia lir.
PIL ji yimten telok mesüra Naga nunger shinga anema masü, saka ali kiburtem temeten kümzüka ayutsü atema dang lir. PIL ji Arla 371A nung lateta aliba ozüngtem kümzüka ayutsü atema dang lir. Anungji, kechiba Naga nunger ali kiburtem kümzüka ayutsü atema inyakba mapa raksatsütsü meranger? PIL anema nokdakba ajanga, nisung kari pei ajangzüktsü atema miim tasa kar atonga inyakba jungkai adoka sayur, ta Lotha Hoho-isa ashi.
Wokha aser Peren zones nung MoGPL nem P&NG dak sendakba maparen inyaktsü atema temelaba agüja lir. Süra, PIL maliba Peren nung MOGPL-i kechiba mapa metenzüker? Kechiba Wokha dak dang tenük yoker? Kechiba MOGPL-i Peren nung mapa metenzüker? ta Lotha Hoho-i asüngdang.
Lotha Hoho-i PIL benoka aliba meyipa agiang ta mesüzüktsü atema Mhonlumo Kikon April 27, 2015 nü Parliamentary Secretary inyaktsü shim ta osang kakettem ashiba nung temenünütsü keta lir, kechiyong PIL ji October 3, 2015 anogo nungang benok. Anungji PIL benoktsü sentonga ano matongdang, kodaser pai iba tenangzükbaji agitettsü? Talisa, Mhonlumo Kikon Parliamentary Secretary shimokba sülen ita pungu lir ang PIL ji benok.
Lotha Hoho-i yimten telok dak sendakba onüktem mesüra yimtenren sasep nung adokba ken o tem nung tebang maitsü, saka onükji lokti temeten indang süra Lotha Hoho-i tebang aitsü. Mhonlumo Kikon ji Lotha nunger asoshi lennir ka lir aser pai Lotha nunger temeten asoshi mapa inyakba nungbo Lotha nungeri pa den külemi noktaktsü, ta mendenpurtemisa metetdaktsü.
Mhonlumo ji tangar kar asoshi tenyatenbonger ka ama inyaktsü atema masü saka Lotha nunger temeten atema noktaktsü, kümzüka ayutsü aser len anitsü asoshi pa Lotha nungeri shimtetba lir. Naga nunger MLA tem ajakji nür constituency-i shimtetba lir, anungji nenok ajak kasa jenjang nung lir, ta Lotha Hoho sangdong nungsa ashi.