MHSS nung Financial Literacy Camp Cum Vigilance Awareness sentong amung

Dimapur, November 03 (TYO) : November 03, 2016 nü Higher Secondary School (MHSS), Mokokchung nung rongsenkettsüng temetetba/densemtsü inyakyim ajungkettsütsü mechi NABARD-i acha ayangba FIF teloki nungita Financial Literacy Camp (FLC) ka Care and Support Society Mokokchung aser Nagaland Rural Bank, Mokokchung na lokteper NABARD-i rongsen nung yaria ayonga mungogo, ta sangdong ka ajanga metetdaktsü.
Iba sentong Care and Support Society nung Managing Director, Wb. Imchawati Kichu-i ketdang asü aser MHSS Principal Wb. Yutsung-i tarurtem pela agizükba o jembi. Sentong nung DDM, NABARD nungi Wb. S. Amarjit Mangang-i NABARD ajanga rongsenkettsüng nung koma sür densema kümtettsü iba indang rasaa ashi.
Pai kaketshirtem den sen rizünga ayutsüji tongtibang aser bank nung saving account ka lapoka ayuba nung tajangzük lir ta ashi.
Paisa sorkar indang Direct Benefit Transfer Policy (DBT) aser DBT ya kechiba nüngdak itemjia lemsatep.
Sen rizünga ayutsü aser sen kanga kümdanga amshitsü yimya sübatsüla, ta kaketshirtem ajungshidang Amarjit Mangang-i, bank tem nung inyakyim balala ajanga tajangzük lenmang lapokja aliba nüburtem nem angatetdaktsütsüji kaketshir ka teinyaktsü asütsüla, ta shisem.
District nung “Vigilance Awareness Week” ya October 31 nungi tenzük aser November 5, 2016 tashi amungtsü, ta pai ashi.
Nagaland Rural Bank Mokokchung nung Branch Manager Changkimenla-i, bank ajanga teyari agütsüba, sen rizünga ayuba aser sen amshiyim tsütsü nüngdakbatem lemsatep. Lai bank tem ajanga nüburtem nem teyari agütsüba kar dena lemsatepa liasü. Iba den külemi lai PMJDY, PMSBY, PMJJBY aser APY inyakyim kaketshirtem dang kanga jangja rateta ashi.
Iba sentong nung DDM aser sentong nung adenertemi teraksa anema nokdangtsü atema tenangzükba-a ka agi.