Mi agi ‘firecracker’ ayokba tesem rongtok

Aurangabad, October 29 (Agencies) : Honibarnep Maharashtra kübok yimti ka nung khen atema mi naro (firecrackers) ayokba tesem ka nung mi tulu adoka dokan tulu aser tila ajak sentepa dokan 200 dak tema den gari 50 dak tema rongtok, ta ketdangsertemi ashi.
Iba mi agi nisung 10 dak tema terara yiruba dak alaka asüba osang mali kechiba süra dokan kiburtem aser customer tem ajak lendong nungi mapang shitak nung jenbutet. Ajisüaka gondha ishika lir külen nisung ana mangur ta osang aruogo, ta ketdangsertemi ashi.
Iba mi jagi tetsüng asem aser pezü aketba gari terer dak tema aser tetsüng ana aketba gari 20 dak tema meshi meshia rongtoktsü.
Ketdangsertemi ashiba agi, mezüng bushisüngdangdang iba mi ya Aurangpura Diwali firecracker ayokba tesem, Zilla Parishad moapu nung aliba dokan kar nung light süngzü rongdangba ajanga adok asütsü ta nguteta lir.
Iba tesem arongdang item firecracker tem ola tesashi adoka apok aser rocket bomb tem tesem ajakleni kahteta tugo.
Mi lendong adokba ajanga iba tesem kolakdang mokozü tanak adokbaji kilometre aika pilar nungia angutsüsa adok aser dokan kibur o customer tem tekümtsü bushia koleni asemteperar memeteti asemzüa liasü, ta tenük kuli angurtemi ashi.
Iba tesem anasa aliba nüburtema pei ki toktsür taküm kümzüktsü atema jena ao.
Tanü akoksabaji sen crore aika alang lir ta asadangtetogo.
Iba mi lendong ajanga takoksa ajurur alirtem nem temonok agütsütsü, ta lendong tesem semdangba mapang Aurangabad nungi Shiv Sena MP, Chandrakant Khaire-i metetdaktsüogo.