Mi ajanga Uttarakhand nung arem hectare 2268 rongogo, nisung 7 asü

New Delhi, May 01 (Agencies): Uttarakhand state kübok district aika nung merok mi ajanga arem hectare 2269 rongtokogo aser nisung tenet tashi süogo.
Tanü Union Home Minister, Rajnath Singh-i iba state semdanga Chief secretary aser sorkar ketdangsertem den senden ka mena iba tensa indang o lemtepogo, aser iba mapang pai, Centre-i  teyari ajak agütsütsü, ta shiogo.
Rajnath Singh-i Central ketdangsertem dang state sorkari mi azüoktsü merangba nung akokba tashi agi yaritsü tuyuogo.
Yashi Home Minister Singh-i state Angh, KK Paul den phone ajanga iba osang metetpelaa liasü.
Mi remsepba maparen nung state sorkar den yariteptsü atema Home Ministry-isa National Disaster Response Force team aika yokogo.
Tanü nungi tenzüka IAF indang Mi 17 helicopter-i Nainital nung tzü endangi.
Iba mi lendong tenzüker nisung tenet tashi süogo. State nung Pauri, Nainital, Rudraprayag aser Tehri district tem tamajungba kongshia lir.
Union Environment Minister, Prakash Javadekar-ia, arem nung merok mi tebilemtsü ya Centre sorkari kanga süoki ia agir aser akokba tashi agi yaritepdar, ta ashi.