‘Mi Home’ aser ‘Moto Hub’ ama Huawei indang store lapoktsü

August 5, 2017 (Agencies): Huawei indang sub-brand “Honor” smartphone tem kanga nüngtugusüa India nung ayokba sülen tier II aser III yimtitem nung talisa parnok shishilembaba atsülangtsü atema sentong aliba company ketdangser kati metetdaktsü.
India nung Xiaomi pur indang Mi Home exclusive retail store ana Bengaluru nung lapokogo aser kasa mapang nung Lenovo meyong Motorola pur indang Moto Hub trok Delhi-NCR aser Mumbai nung August 3 nü lapokogo.
“Offline shishilembaba tsütsü tali renloka odar anungji iba tsütsü tali akangshitsü asoshi onoki inyakdar. 4G tali renloka odar aser iba dak sendakba nung onoki tier II aser III market nung tali rangloker inyakdar,” ta Huawei India-Consumer Business Group Vice President, Sales, P. Sanjeev-i osangbenertem dang ashi. Huawei puri parnok shishilembaba China nung dang akangshiba masü saka bendang lena tali akangshia odar koba nung India ya parnok asoshi kanga dang tongtibang tesem ka lir.
Alima ajunga nung parnok indang smartphone tem ayokba shilem asem agi renlokogo aser iba nung 2017 küm second quarter tashi nung parnok indang phone tem million 365 bo yokogo.
‘After-sale device support’ tsütsü tali tashi itshitsü atema smartphone company Huawei-i India nung taoba ita service centres17 amenokogo. Sanjeev-i ashiba agi, item service centre tem amenokba sülen Huawei ajanga consumer tem nem after-sale services tajungtiba agütsütettsü.Taruba ita tem nung Honor puri jenjang balala nung device aika sayatsü asoshi sentong lir. India nung sen 10,000 nungi 15,000 tsüngda nung ayokba phone tajungtem rongnung Honor pur indang Honor 6X, Honor Holly 3 aser 3 Plus densema lir.