Mi lendong nung takoksa ajuruba kibong shia nem 10,000 agütsütsü

Guwahati, May 4 (Agencies): Mongolbar aonung Ambari tesem anasa SK Bhuyan lenmang nung mi lendong nung takoksa ajuruba kibong shia nem state sorkari teyari sen 10,000 agütsütsüba Bodhbarnü sangdongogo.
Iba mi lendong nung ki 46 shi mitsü küma rongtok aser kiojen, osettsüset tem lakh aika jenjang rongtokogo. Aji saka lendong nung nisung kata asüba osang tang tashi nung kecha mali. Fire brigade police temi iba mi ghonda aika agiang temseptet.
Lendong atalokba tesem semdangba mapang finance minister Himanta Biswa Sarma-i ashiba agi, state sorkari mi lendong nung takoksa ajuruba kicha aser kibongtem khen atema jenoka alitsü asoshi tesem kar renemtsütsü atema jenjang tapet agitsü.
“Mi lendong nung takoksa aluba ajak jung junga asadanger tapet teyari agütsütsü,” ta Sarma-i ashi.
Mi lendong nung takoksa ajuruba kibongtem khen atema Assam Textile Institute aser handloom & textile directorate, office nung jenokdaktsüa lir. Iba tesem nung aliba local temia teyari balala agütsüdar.
Kamrup (Metro) district administration ajanga kibongtemnem chiyongtsü, tzü aser medical assistance peria agütsütsü asoshi inyakdar. “Mi lendong nung kaketshirtem indang kaket balala rongtokba dak sendakba nung text book tem aser tanga tenüngdakbatem angati agütsüdar,” ta Kamrup (Metro) deputy commissioner M Angamuthu-i ashi.
Pai ano iba lendong adokba tera jung asadanger anogo 7 tsüngda nung osang agütsütsü asoshi tetuyuba agütsüogo.
Mi lendong adokba tesem indang ali kiburjia mezüdoki bushisüngdangtsü, ta Police commissioner Hiren Nath-i ashi. “Mi lendong adokba tesem nung taa agüja lidaktsüba kitem kanga tsüngtepa yanglua aliba ngutetogo, iba ajanga Fire brigade senzüsenpong kanga mesademi liasü. Ki kiburtem shirnoki lendong nungi kümzüktsü asoshi kisüba yimya nung telatetba ka agüja aliba alema ki asü, parnok ajaknem tapet temerenshi agütsütsü,” ta paisa ashi.
State nung fire & emergency services department dang yimti nung lendongbang nung aliba tesemtem tekeraba nung asadangtsü asoshi tetuyuba agütsüogo. Mi adokba tera tang tashi mejangja, saka LPG cylinder aika apokba ajanga iba lendong atalok ta bilemer.