Mi Note 10 February nung sayatsü akok

New Delhi, Aenjeti/January 12, 2020 (Agencies): Xiaomi-i 108-megapixel aketba smartphone ka India nung sayatsü sangdongba sülen ita ka dak tema süia arudar. Xiaomi India nung nisung balalai iba handset tasen yakta sayatsü asoshi lemsatepa aruogo, saka parnoki phone dak sendakba osang tejangja metetdakja mali.
Ajisüaka, India nung Xiaomi Mi Note 10 sayatsü ta olulu osangtem website balala ajanga prokshia liasü aser küm tasenba sülen, Xiaomi-i ano iba smartphone India nung sayatsü asoshi osang metetdaktsüogo.
Xiaomi indang MD Manu Kumar Jain-i Twitter ajanga, India nung company-i Redmi Note 7 Pro sayaba sülen küm ka abensaogo. Jenjang dalang smartphone rongnung Note 7 Pro ya ka asütsü aser iba phone nung 48-megapixel camera keta lir, koba ajanga smartphone industry nung iba handset yagi shilem tuluka agiogo.
2020 nung, smartphone company ajaki 108-megapixel camera amshitsü ternemba lir aser Xiaomi-i iba küm tanga company dang nungi mezüng 108 megapixel camera aketba Mi Note 10 sayatsü imlar.
Tang tashi nungbo, Xiaomi indang line-up nung Mi Note 10 smartphone dang asütsü. 2019 November nung, Xiaomi-i Mi Note 10 sayaba ajaki jangjaa lir. Iba handset nung Samsung indang 108-megapixel sensor inoka yangluogo. Mezüngbo, iba smartphone ya India nung December ita sayatsü osang sangdonga liasü, saka Mi Note 10 ya February nunang sayatsü akok.
India nung Redmi Note 7 Pro smartphone ya 2019 March ita sayaa liasü aser company-i Mi Note 10 ya February tashi nungbo sayatsü imlar.
Shislembadak, Mi Note 10 smartphone yagi OnePlus 7T aser Asus 6Z smartphone den tokteptsü. Taküm India shishilembadak, Mi Note 10 ya Xiaomi indang jenjang tasaktiba smartphone asütsü. India nung Xiaomi Mi series indang Mi A3 aser Mi Mix 2 yokdar.