Miami Open: Potro o Venus nati takok angu Wozniacki tsükogo

Miami, Metsüremi 24 (Agencies): Miami Open ATP (Association of Tennis Professionals) asayamung Rogonü (Friday) tebur kija asaya nung Argentina nunger Juan Martin Del Porto-i Netherland nunger Robin Haase madak 4-6, 7-5, 6-2 agi takok nguogo.
Taoba US Open asayamung takok ngur alisang Porto-i iba asaya densema asaya 12 khen danga tamakok mongui kokyonga arudar. Tawa Acapulco aser Indian Wells asayamung nung Potro-i takok ngur külen ATP title tasembuba akoktsü meranga asayadar.
World no.6 nung alisang Del Potro-i asaya nung mezüngbuba serve point shilem 79 aser aces pungo ngua liasü. Iba asaya ghonda ana sür minute 9 nung tembang.
Tebur kija asaya ka nungsa seed 26buba nung alisang Japan nunger Kei Nishikori-i Australia nunger qualifier John Millman madak 7-6 (7/4), 4-6, 6-3 agi takok ngua tsükdaktsüogo. Tasembuba round asaya nung Del Potro-i Nishikori den asayatsü jangjaogo.
Kasa asayamung Rogonü tetsür kija tanabuba round asaya nung Grand Slam tenetben koker alila America tsür Venus Williams-i Russia tsür Natalia Vikhlyantseva madak 7-5, 6-4 agi takok nguogo.
Iba asaya mezüngbuba set asaya nung Venus point 2-5 agi Natalia sülen liasü saka straight set pungo atonga ngua mezüng set lai akok. Tanabuba set asaya nunga Venus 0-3 ta tesülen liasü, saka lai game tenet nungi trok koka tanabuba set dena akok.
Tetsür kija asaya tanga ka nung seed 29 nung alila Netherland tsür Kiki Bertens-i America tsür Varvara Lepchenko madak 5-7, 7-6 (7/5), 6-1 agi takok ngutetogo. Venus aser Bertens na tasembuba round asayatsü jangjaogo.
Maneni, kasa asayamung tetsür kija asaya ka nung Australian Open nung takok ngua alila Caroline Wozniacki-i kanga dang taoksatsüka Puerto Rico tsür Monica Puig den 0-6, 6-4, 6-4 agi tamakok ngua tsükogo.
Arishi küm 27 tain aser world no.2 nung alila Caroline-i mezüngbuba set minute 30 majungdang kanga dang ayonga koka liasü.
Miami Open nungi tsükadokba ya Caroline atema kanga dang tejashitsüka lir. Taküm küm tetenzüklen Caroline-i Australian Open asayamung Melbourne nung Romania tsür Simona Halep madak final asaya nung takok ngua lir.