Michael Jackson’er jabasoi ken metenteter mesüra metsüngsangteter

Los Angeles, November 5, 2016 : Asür King of Pop Michael Jackson’er jabaso Prince-i tebu ama ken metenteter mesüra metsüngsangteter.
Arishi küm 19 tain, Prince-i, kübo ama sabang nung shilem agia jajatsü tejangraba mali saka production tsütsü ang ni temulung agütsüner, ta ashiba femalefirst.com osang ajanga metetdaktsü.
“Nisung ajaki ni kentena tsüngsangtsü amai bilemer. Kü taküm asoshi music ji shilem ka amai lir. Ozü kibongi aniba ama music ajanga ni iba jenjang tongdaktsü, ajisüaka ni mezüng nungi production mapa ang jangrar. Kübo-i kü dang ni kechi inyakner ta asüngdangdang ni director aser producer mapa jangrar ta langzüka liasü,” ta Prince-i The Los Angeles Times osangkaket dang ashi.
Tang Prince anepalutsü atema benzodiazepine mozü talila achiba agi 2009 küm asüsang, Jackson meliaka jabasoi tebui sayutsüngi agütsüba kodanga mamatsü.
Nübui pa masüdang nai mamatetsüsa sayutsüngba kaji kechi ta asüngdangdang Prince-i, “‘Shinga daka tamang’. Mezüng angatsübo kanga majung amai, ajisüaka nisung aika pei sasa ajungmesor. Pai tangar dak khen nung masü saka kanga junga shisadangerang amangang ta shinerba liasü. Onok tangari metetba kibong asüba agi nisung aikati kanga sensaksemnür,” ta langzü.