Michael Jackson’er tanurtem dak küm nung £2.75 million intoker

August 17, 2015: Michael Jackson’er tanurtem anepaludang küm nung sen pound million 2.75 intoker, ta court shidi tasen kar ajanga metetdaktsüogo.

Tesüiba mapang ‘Thriller’ ken atensang, asür Jackson meyong lawyer temi court nung shidi tasen agütsüba nung par tanur arishi küm 18, Prince, arishi küm 16, Paris aser arishi küm 13, Biggi nunger dak sen jenti intokba den parnok tang Calabasas, California nung aliba ki para ita nung sen pound 22,000 agütsüba shia lir.

Prince aser Paris na Buckley School nungi manen tsüngda fee nung sen pound 48,000 intoka liasü aser iba sülen tanga school-i belendang sen pound 19,000 intok, ta The Sun osangkaket ajanga metetdaktsü.

Ano sen intokba kar yamai: nija atema tayimtsü sen agütsür amshiba nung sen pound 90,000, par alidak mapa inyakertem nem agütsüba nung sen pound 300,000, mapa inyaker tangar kar dak sen pound 30,000, Bigi tasoba benjung mongtsüba nung sen pound 600 aser Prince o Paris na chichiba tetsü, Debbie Rowe den ajuruteptsü Hawaii-i anir aodang sen pound 274,000 intok.

Jackson’er tanurtem ya arishi küm 85 tain, tetsü Katherine-i repranger aser lar ki Hayvenhurst yanglushidanga sen pound 380,000 dak tema oa yanglu.

Michael Jackson ya 2009 küm temulungjang tashidak agi arishi küm 50 nung asü. Pai tasüdang rongsen ajak agi, sen pound million 320 alang toktsür asü ta ashir. Aser iba roangsen ya par tanur asem arishi kum semerasem sem junger külen ang kasasa lemsatsü saka tesadang ka kabo arishi küm 40 ajungba sülen ang agütsütsü renema lir.