Michel Aoun Lebanon Tir shimogo

Beirut, October 31 (Agencies): Lebanon parliament-i par Tir inyaktsü atea taoba mitkar lenir, Michel Aoun tanü, Hombar nü shimogo.
Tan Aoun Tir shimba ajanga Lebanon-i ita 29 shi ajuruba yimtenren makmakshimak tia benettsü teimla aliba den külemi, Sunni Muslim telok lenisang, Saad al-Hariri Ato Kilonser shimtsü renemba osang angazükogo.
Arishi küm 80 dak tema tain Aoun-i parliament züngsem 83 nungi vote ngua, Tir ka akümtsü atema nungdakba vote noklang nung shilem 65 dak tema ajangzüka, tan Tir tasenba akümtsü jenjangji angu.
Aoun-i temaba jenjang ngua, Tir tasenba akümtsü maongka anguba osang nüburtem dang sangoktsüba sülen nüburtemi Beirut yimtiba ajunga nung pokshitsü osettsüset pokdakja, kanga dang pelatepba osanga angazükogo.
Hariri-i Aoun pusema nungitba ajanga par Lebanon’er kibok ken o aser inyakyim nung Suadi Arabia linüki teka amoktsüren ajema akümba kulia anugr lir.
Ano külen, Hariri-i 2009 nungi 2011 küm tashi Ato Kilonser menden abendang kechisarena ajunga takok ngua inyakba nüngtem nung taruba 2017 küm agitsü ayongba parliamentary election nung pai pa pusemer jenti ngua, Lebanon Ato Kilonser menden tanaben abentsü maongka angutsüsa jenjang ngua aliba olen ka par yimtenren tia tendanger mongintemi metetdaktsüogo.
Aoun-ia tan Tir menden abentsü temeten anguba sülen Ato Kilonser tasenba shimtsü den sentakba osangtsüsang agitsü atema parliament MP-tem den taruba hopta ajuruteptsü sentong lir.