Michel Platini-i UEFA Tir menden toktsütsü sangdonger

Lausanne, May 09 (Agencies): UEFA Tir, Michel Platini-i UEFA lenisütsü menden toktsütsü lemtetba osang ka tanü, Hombar nü sangoktsüogo.
Ochimashi inyakba ken o nung ajemdaker pa nem agütsüba küm 6 tashi football asayatsüren nung shilem magitsü o bendang tanaben reprangshitsü asoshi benokba onük Court of Arbitration for Sport (CAS)-i magizükba sülen Platini-i UEFA Tir mendenji toktsütsü lemteter lir.
Ozüng alema dollar sen million 2 tashi taoba FIFA Tir, Sepp Blatter ket nungi agizükba ken o nung pa tenüng metentsütsü nükjidong nung pai UEFA Tir menden nungi anener maneni okadak nungdakba ken o benoktsü renemba osang ka France nunger Platini-i metetdaktsüogo.
CAS-i Plantini-i benokba onükji magizüktsü lemtet aka, pa nem agütsüba temerenshiji küm 2 agi tajemba kümdaktsüba aser pa dang dollar sen 80,000 nungi sen 60,000 küma ajemer senchi achitsü lemtetshia liasü.
“CAS-i tanü aibelena telemtetba agiogo. Kü nem agütsüba temerenshi magientsü lemtetshiba ajanga ni taruba FIFA Tir election nunga candidate ka ama tokteptsü lenmang shibangtsür lir,” ta Platini-i mepelaba olen ka metetdaktsü.
Platini-i 2007 küm nungi tenzüka UEFA Tir menden abenba jakdang pai par France tenüng nung football asaya aser nungtugu Ballon d’Or sempeta 3 ben tashi agizük.