Micromax ajanga sen 24,999 jenjang Dual 5 smartphone sayaogo

New Delhi, March 29 (Agencies): Micromax ajanga sen 24,999 jenjang camera ana aketba Dual 5 smartphone Boddbarnü sayaogo. 2017 küm smartphone shishilembaba nung shilem 10 agi timba akümtsü nükjidong nung iba ‘premium’ phone ya saya.
“Alima tzü mopung den tesütep hardware, software service, shidi sen mamshii lijaliyongba aser customer service agütsütsü nükjidong nung iba premium phone ya yanglu,” ta Micromax Informatics indang Co-Founder, Rahul Sharma-i ashi.
Iba Dual 5 nung EAL 5+ security ama bank card keta lir saka aser EAL 2+ security dang tajungba lir.
Iba smartphone nung Unique Fingerprint lir aser kanga kera mapa inyaker. Unique Fingerprint amshitsü asoshi ‘security chip’ balaka inoka lir aser iba chip nung fingerprint aser password rizünga ayur.
Iba smartphone nung Wisdom Double Photo 2.0 indang camera ana lir.
Dual 5 smartphone indang tesülen 13MP camera ana aser tejaklena flash dena 13MP camera ka lir. Iba camera ajanga tangokba video aser noksa ya 3D video aser 3D noksatem kümdakja VR glass amshia reprangteter.
Micromax Dual 5 phone nung Qualcomm Snapdragon 652 processor aser 128GB memory keta lir. Iba phone indang battery tashi ya 3,200mAh lir aser Quick Charge 3.0, Power Saving Mode keta lir.
Iba phone ya April 10 nungi angutsü aser iba phone alitsü asoshi Bodhbar nungi tenüng züluoktsü.