Microsoft-i Windows 7 aser Windows 8 ayokba anener

New York, November 04 (Agencies) : US tech tetsüti Microsoft-i Windows 7 aser Windows 8 operating systems naprong ayokba anenogo aser item windows ya joko PC tasen alidang inoker mangutsü.
“Joko mayoktsü ta kodang südir item Windows tem ya retailer mesüra Original Equipment Manufacturers (OEMs) tem dangi joko meyoktsü,” ta Brihostibarnü Forbes.com-i metetdaktsü.
Anungji nai PC tasen ka nung Windows 7 mesüra Windows 8 inoker ali nü nung OEMs ket nung anünga aliba inoktsüba dang lir — aser anünga aliba Windows temji kara tematoktsü.
OEMs ta kodang südir Dell aser Toshiba mesükba PC yangluba company tem lir, shirnoki item Window tem parnoki yangluba computer tem nung mezüng yongi inoker ayoker.
Windows 7 ya 2009 küm sayaba sülen taküm agi küm tenet tashi yokogo aser Windows 8/8.1 yabo küm pezü ang ayok.
Windows 7 aser Windows 8.1 na ya January 2020 aser 2023 tashi update asütsü, ajisüaka item ya ayokba anenba ajanga Windows 10 kanga junga yoktettsü, ta kasa osang ajanga ashi.
Tashishitsü aketba operating system, Windows 10 ya Microsoft-i angadi update sütsüba anenba sülen nungi meyokteti liasü, aji oda süaka tang ya joko benjong mapang atonger anungji tajemba agi noklang nung shilem 25 tashibo market share nung densemtettsüsa yoktettsü akok.
Taruba küm Windows 10 atema tongtibang update ana asütsü, ta taküm küm tetenzüklen Microsoft-i sangdongogo.
Windows Central osang ajanga ashiba agi, mezüng update ji Redstone 2 ta nüngja agütsür 2017 nung asütsü – aser ibaji 2017 küm tetenzüklen asütsü; tanabuba update ji Redstone 3 ta nüngja agütsür – 2017 küm meyi mapang asütsü.