Mid Day Meal Scheme ken o yakta bushisüngdangtsü akhanger

Dimapur, Luroi (August) 21 (TYO): Naga Students’ Federation (NSF)-i Vigilance Commissioner dang Department of School Education kübok Mid Day Meal Scheme nung tim masüba inyakyim bushisüngdangba mapa tekaraba nung inyaktsü atema mepishi.
Iba bushisüngdangba mapa ya State Vigilance Commission ajanga inyaker.
Naga Students’ Federation aser Federating Unit temi Education Tour, 2018 aodang sorkar school aika semdang aser idangji school aika nung Mid Day Meal Scheme magütsüba metet.
Academic year 2018 nung school teimba ka nem Mid-day meal magütsü aser schook aika nem Dal (Dried, split pulses) aser cooking cost agütsüba dak alaka tanga kecha magütsü. Iba jagi school ketdangsertemi kaketshirtem nem chiyungdaktsütsü jang aser tanga tachitsütem alitsü atema Dal yokdoktsüsa aküm, ta NSF-i Vigilance Commissioner dangi züluba shidi nung shia lir.
Mid Day Meal Scheme nung tim masüba maparen atema State Vigilance Commission-i bushisüngdanger, anungji iba shidi anguba sülen anogo 30 tsüngda osang agütsütsü metetdaktsür. Maneni, 2017 & 2018 indang Mid Day Meal Scheme nung tim masübatem bushisüngdangtsü asüngdanger aser aibelenertem ozüng tapet agi merenshitsüla, ta NSF Tir Kesosul Christopher Ltu aser Tongti Tezülur Imtiyapang Imsong nati shidi nungsa ashi.