Midday meal atema sen crore 151 agütsü

Dimapur, July 14 (TYO) : 2010 küm nungi 2016 küm tashi nung Ministry of Human Resources Development (MHD) nungi Nagaland nung azünger tanurtem asoshi ‘mid day meal” atema sen crore 151 lakh lir tuku ser meyirijang tukur ka (151,49,91,000) agütsügo, ta nübortem asoshi aria bilemer sensosanger kari RTI ajanga School Education Directorate dang metetnüa asüngdangba nungi telangzüba nguogo.
Iba sen nung jagi School Education Directorate-i sen crore 148 lakh 5 ser meyirijang semer ana agizük saka tanüngba sen crore 3 lakh 44 meyirijang 59 kong endokar meshitetter.
Iba senji School Education Directorate o Finance department na tsüngda samaa lir ta parnokisa metetdaktsü.
Ano, tesüngmangtsü kaji soruchioker (cook) meshim ser parnok tenüng nung 2011-2012 küm sen crore ka lakh 32 agizüka lir ta iba maparen bushisüngdangertemi metetdaktsü.
Ano, school education-i Finance department nungi agizükba sen Rs. 148,05,32,000/- nungia School Education Director-i DEOs / SDEOs 26 nem agütsübabo sen ajak agi  crore 76 lakh 19 ser meyirijang 17 noklang 8 ser semer trok (Rs. 76,19,17,836/-)  adoker, anungji tanüngba sen crore 80 lakh 95 meyirijang 76 noklang 8 ser 36 (Rs. 80,95,76,836/-) mali adoker.
Anungji tang nübortemi sen  Rs. 80,95,76,836/- samabaji kodaser sama metetner aser tetsüngda nung sen Rs. 3,44,59,000/- samabaji shiba kuli asütsü (?) ta RTI ajanga metetnüa asüngdangertemi metetdaktsü.
Iba ama nübortem asoshi teyari aruba jangotsü samadaktsüba ya nübortem ain madokdang aser timtemi maidang Vigilance Commision-i bushitsü mepishir, ta parnokisa metetdaktsü.
Iba tatalokba ken o metetnüa asüngdangertemji tamalen Sema Kaketshir Mungdang nung tir inyakertem, Aheto V Yeputhomi, Hukavi T Yeputhomi, L.Khevishe Achumi aser S.Zhevihe Sumi nungertem liasü.