Middle East nung tensa mejungi kümdaktsüba maparen aitsür: Francis

Vatican City, October 09 (Agencies): Alima ajunga nung Catholic tamangba yimsü benshir lenisang, Pope Francis-i Middle East ajunga nung tensa mejungi kümdaktsüba maparen aitsüba olen ka tanü Hokolbar nü metetdaktsüogo.

“Syria nungi Iraq, Jerusalem aser West Bank tashi densema Middle East nung tai maketba nüburtem taküm lalutsüsa tensa mejungi kümdaktsüba maparen aitsür. Ano, Middle East nung tensa azüoka kasaji tajungba kümdaktsütsü atema nungdakba maparen inyaktsü asoshi alima lenirtem ajungshir,” ta Francis-i sangoktsü.

“Lendong timtem tia bener arutsürtem asoshi tanen makai sarasademtsür,” ta shia, Middle East tesem balala nung tang tongpang rarartemi par rarabaren anena yimjung nung alitsü merangtsüla ta pai shisem.

Syria aser Iraq na indang lushi shilem tuluba agiba den külemi, par linük ana nung lendong balala atalokdaktsüba Islamic State (IS) kiralongrar telok anema US-i aniba alima teloktep mitkartemi tongpang raraba ajanga Middle East nüburtemi timtem toushi jenti ajuruba osang bushiteta lir.

Ano, Russia-i hopta ishika tejaklen nungi tenzüka par mitkar aser tayimtsütem tsüngdong yoka Syria nung tongpang raradaktsütsü tenzükba ajanga Syria’er mangatettep ken o taoba mapang nungi tamajungba akümtsü tenzükba den külemi, par linük o West na tsüngda tesendaktepa taoba mapang nungi tang tamajungba akümba osang bushiteta lir.

Ano, Israel kübok Jerusalem aser par linüki tashiyim agi agia aliba West Bank na nunga lendong balala ataloktsü tenzükba ajanga Israel aser Palestine linük na tsüngda tongpanga raratsüsa küma tang tensa kanga mejungi lir.