Mideast tensa jungdaktsütsü atema tasa tajung nungdaker: John Kerry

U.S. Secretary of State, John Kerry (Abelen) aser Special Envoy, Israeli-Palestinian Negotiations, Frank Lowenstein nati Paris kübok MFA Convention Center nung amenba Mideast nung tensa jungdaktsütsü senden nung shilem agiba sülen kimalen ayazüka aluba noksa nung angur. (Paris, June 04)

Paris, June 04 (Agencies): Israel aser Palestine na tsüngda yimjung tezüngzüktep agidakja par linük ana tentetdak, Mideast nung tensa jungdaktsütsü asoshi tasa tajung nungdakba olen ka US Secretary of State, John Kerry-i tanü, Honibar nü sangoktsüogo.
France-i ayonger külen Paris yimtiba nung amenba Israel o Palestine na tsüngda yimjung senden tanaben menshidaktsütsü senden nung shilem agia o jembidang Kerry-i tanü iba olenji metetdaktsü.
Tesülen, Kerry-i France Foreign Minister, Jean-Marc Ayrault den ajurutepa jurila senden ka amenba sülen Mongolia bushia aoba osang jangjaogo.
Taküm 2016 küm tatem tashi nung Israel aser Palestine na tsüng yimjung senden tanaben menshitsü ajungshitsü aser par linük ana tsüngda yimjung tezüngzüktep agiba ajanga Mideast ajunga nung tensa tajungba kümdaktsütsü alizüng tan senden nung shilem agir alima linük 20 dak tema nungi lenirtemi arok alizüng yua lir.
Ajisüaka, tan senden nung shilem agitsü asoshi Israel aser Palestine naprong mejaokba osang angazükogo.
“Teti yimjung nung lia tensa jungdaktsütü asoshi Israel aser Palestine na pronglai par mangatettep ken o bentettsü alizüng ayutsü ajungshir,” ta Kerry-i yashi, Hokolbar nü metetdakja liasü.
“Israel aser Palestine na tsüngda yimjung tezüngzüktep agia par linük ana tanaben sentakshidaktsütsü asoshi asenoki nungdakba tasa aser lenmang bushitsüla,” ta pai tanü senden nung shilem agirtema ayongzükba osang jangjaogo.
Israel aser Palestine na tsüngda yimjung lidaktsütsü aser Israel-i 1967 küm nungi tenzüka tashiyim agi ali lushi agiba anentsütsü lenmangtem bushitsü asoshi tan senden nung shilem agirtema bangjemogo.
Ano külen, “Israel aser Palestine nati par linük ana tsüngda teti asoshi yimjung nung alitsü merangtsüla. Ano, iba yimjung tezüngzüktep asangsang nung agidaktsütsü asoshi alima tashi abenba linüktemia tongti shilem agitsü ajungshir,” ta FranceTir, Francois Hollande-ia tanü metetdaktsü.