Mideast tensa tamajungi Syria yimjung sentong raksatsütsü akok: EU

Brussels, January 04 (Agencies): Iran aser Saudi Arabia na tsüngda tesendaktep mejungi akümba ajanga Syria yimjung sentong nem tetsükdakba bener arutsütsü akok ta European Union (EU) foreign policy lenila, Federica Mogherini-i tanü Hombar nü metetdaktsüogo.
“Shiite kin kanga longsoa aliba Iran aser Sunni kini yimsüsütsü tashi benokba Saudi Arabia na tsüngda tesendaktep raksa tensa mejungi akümba ajanga Syria nung yimtenren tebentetbaren bener arutsütsü asoshi tenzükba yimjung maparen raksatsütsü akok,” ta lia ashi.
Saudi sorkari tongti Shiite putir ka tepseta merenshiba sülen lai Iran foreign minister, Javad Zarif den telephone ajanga jembia tensa tamajungba mekümdaktsütsü pangjemba olena lai shisem.
“Syria nung adokba mangatettepbaren bentettsütsü aser kiralongrar teloktem makdoktsü alizüng tulu yur alima ajungai Syria nung mapa tajung tenzüka lir saka tan Iran o Saudi na tsüngda tesendaktep mejungi akümba ajanga iba mapa tajung ajunga amajok kümdaktsütsü ana nung dang lir,” ta Mogherini-i nenshia ashi.
Ano külen, lai Saudi foreign minister, Adel al-Jubeir dena telephone ajanga jembia par linüki aibelener nem tasüba temerenshi agütsübaren EU-i anema olen ka lemsatepba osang jangjaogo.