Migrant khuret bentettsü atema Europe lenirtemi senden amener

Austria yimtiba, Vienna nung Migrant senden amenba jakdang Austria Chancellor, Christian Kern (Tiyongtsü)-i Germany aser West Balkans linüktem nungi lenirtem den agiba arok noksa ka yangi angur. (Austria, September 24)

Vienna, September 24 (Agencies): Europe-i ajurushia aliba pei talidak aser linük toktsür Europe nung jenoka alitsü meranger refugee aser migrant nisungtem den sentakba khuret bentettsü tasa aser lenmang bushitsü nükjidong nung Europe lenirtemi Austria kübok Vienna yimti nung senden amentsü tenzükogo.
Austria Chancellor, Christian Kern-i ayongba senden nung Germany, Greece aser West Balkans nung tentetba linüktem nungi lenirtemi shilem agiba osang jangjaogo.
European Union (EU) kübok züngsemba linüktemi refugee aser migrant nisungtem ozüng alema maitdaktsütsü asoshi arrtsü kanga junga nokdanga ayutsü onük tanü senden nung shilem agirtemi benoka jembiba osang angazükogo.
“EU’er arrtsü ajunga kanga junga anükba ajanga dang Europe-i migrant nisungtem den sentakba khuret ya takok ngua bentettettsü ta migrant nisungtem den sentakba khuret benoktsü tetenzükba anogo nungi bilema aruogo,” ta tanü senden amenba jakdang EU Council Tir, Donald Tusk-ia metetdakja liasü.
Lendong kanga sashia atalokba Syria, Iraq aser Afghanistan linüktem toktsür Europe nung jenoka alitsü merangertemi ozüng alema Europe anüdoklentip tsütsüleni aidak, Balkans route shibanga ayuba ajanga Europe-i ajurushiba migrant nisungtem den sentakba khuretji bentettsü akok ta tanü senden nung shilem agirtemi onük benoka jembiba osanga angazükogo.