Migrant noklang aika tzüyim nung Khristmas amungtsü

Rome, Luchii/Dec. 22 (Agencies): Kinü tanur ka aser tetsü Malta-i anir aoba sülen Libya nungi aruba migrant noklang aika kümzüka alir asoshi Italy nung rongnendak shibangogo, ta Italy Interior Minister Matteo Salvini-i Küptoknü ashi.
Malta nungertemi meindokba sülen Rogonü kümzükba tebur, tetsür aser tanurtem ya Italy nung yutsütsü Spanish NGO Proactiva Open Arms ajanga mepeshi, ta anti-immigration minister-i ashi.
“Kü indang telangzüka tejangja: Italy nung rongnendak ajunga shibangogo. Nisung meimchir shibelener aser parnok yarir atema tepela mapang temogo,” ta Salvini-i Twitter nung zülutsü.
Libya tzüküm nung anogo asem jakdang asoba tanur aser tetsü ya Malta coastguard helicopter ajanga bener ogo, ta NGO ajanga ashi.
“Rong nung nisung 311 mener onok maneni jajar, rong anendak maka aser teyari nüngdaker,” ta iba telok ajanga Twitter nung lemsatep.
Proactiva Open Arms ajanga Rogonü ashiba agi, parnoki rong sem nungi nisung migrant 300 dak tali kümzüka lir aser karbo mashisa lir aser kinü tanurtema lir.
NGO ajanga video post sütsüba nung, tzüyim nungi kümzüker karbo sür liasü aser parnoki iba video nung, “Parnok anizüktsü asoshi rong anendak kata mali aser Malta-i onok nem chiyongtsü agütsütsü memulunger. Ibai Khristmas masü,” ta zülua lir.
Open Arms tenzüksang, Oscar Camps-ia Tweeter nung, “Nü ola tulu aser nü osang ya kenü anogo tembangtsü. Saka küm ishika lir nai inyakba aser nai jembiba atema nüdak jakzükertem aktsü ta nai metetdang,” ta zülutsü.